Shillong, Rymphang, 11: Ka Khasi Students Union (KSU West Jaintia Hills District Unit ha ka sngi Baar ka la leit ban pynsngew sha ki tyndong shkor jong u Deputy Commissioner ka West Jaintia Hills District u Abhinav Kumar Singh halor ka jingshah byrngem jong ki Khasi-Pnar kiba sah ha ki shnong kiba hap hapoh ka thaiñ Block-1 ha ka seng ki samla pule ka jaidbynriew Karbi kiba don hapoh ka shatri jong ka Karbi Students Association ban ym ïashim bynta ha ka elekshon sha ka Jaiñtia Hills Autonomous District Council ka ban sa long shen.
U General Secretary jong ka Seng u samla Leningrad Tariang ha u kyrwoh ba la phah sha ki lad pathai khubor ryngkat bad ki video u la ïathuh ba u Deputy Commissioner u la kular ban shimkhia ba ki briew kiba shong ba sah ha ki shnong jong ka thaiñ Block-1 kim dei satia ban duh ïa ka hok thep vote bad ïa ka jingleit ïalap elekshon jong ki kyrtong.
U la maham ruh lada ka Karbi Students Association ka dang iai bteng ban pyndik ia ki Khasi Pnar ha Block-I ka seng ruh kam banse ban shim da kane kajuh ka sienjam.
“Ka seng kan ym sngap shuh ïa kine ki jingbyrngem jong ki jaidbynriew Karbi pyrshah ïa ki briew jong ngi kiba shong basah ha ka thaiñ khappud bad kane ka dei ka sien bakhatduh ïa ki (Karbi) ba lada jia eiei ïa ki briew jong ngi sha khapud, ki Karbi hi ki dei ban shim ïa ka jingbahkhlieh,” la ong u GS ka KSU West Jaiñtia Hills District Unit.
Haba maham ïa ka KSA, u samla Leningrad Tariang u la ong, “kane kan long ka khubor kaba shai ïa ka Karbi Students Associaton (KSA) ba ngi la sngap jar da ki snem ïa ka jingleh bym hok ïa ki briewjong ngi hynrei naduh kane ka sngi ngin ym shu kbum shuh ïa ka shyntur ïa ki jingleh bym hok ki jong phi namarba ma ngi ruh ngin sa leh lem kumjuh.”
“Kum para jaitbynriew riewlum ngi kwah ban ïalong shitylli kawei haba ngi ïakhun ïa kino kino ki jingeh halor kino kino ki mat hynrei ki paid Karbi kim kwah ba ngin ïatreilang ryngkat na ka bynta ka jingshngaiñ jong ki jaidbynriew riwlum hynrei phi ïai bteng ban thaw jingkulmar ïa ki briew kiba sah ha khappud. Ngim kwah satia ïa kane, hynrei ngi kwah ïa ka jingsuk ha khappud bad ha jaka ba dang don ka jingïakajia pud. Lada phi dang ïai bteng ban byrngem ïa ki briew jong ngi, shisien ka sngi ruh ngin sa leh kumjuh ïa phi.
U General Secretary ka KSU Shilliang Myntang Circle u samla Ehbok Sten haba bynrap halor kane, u la kyntu ïa ki Khasi Pnar kiba sah ha ki shnong ka thaiñ Block-I ba kim dei ban tieng ban syier hynrei ki dei ban leh ïa kaei kaba ki dei ban leh bad ban leit ban wan kumba ju long bad lada ki dang shah pyndik ha kiwei pat ki jaidbynriew bad ha ki jaidbynriew Karbi ka seng kan shimkhia ïa kine ki jingeh.
U la ong ruh ba ka KSU ka long kaba kloi ban mih shakhmat lada ki paid Khasi-Pnar ki dang shah pynthud ha ki shnong khappud.
