Shillong, Naitung, 09: Ka Sorkar Jylla ka dang bishar bniah ïa ka lad ban pynkhlaiñ ïa ka aiñ Meghalaya Residents, Safety and Security Act (MRSSA) 2016 lane yn wanrah da ka aiñ kaba thymmai ban pynthikna ïa ka jingshngaiñ jong ki nongleit nongwan ha ka jylla Meghalaya da kaba buh jingmut ïa ka jingkylla ka jinglong jingman na ka jingjur shaba palat ka jingwan rung tuh ki mynder na ka ri Bangladesh.
U nongaiktien ka Sorkar MDA uba dei ruh u Myntri Sorkar u Bah Paul Lyngdoh u la ïathuh ha ki nongthoh khubor ha ka sngi Balang ba ïa kane ka mat la ïakren ha ka jingïalang kaba la pynïaid da u Symbud Myntri Rangbah ka jylla uba khmih ïa ka tnat Kam Pohing u Bah Prestone Tynsong lai sngi mynshwa.
“Ngi la shim ruh ïa ki lad la ngin pynkylla ïa ka MRSSA lane yn wanrah da ka aiñ kaba thymmai ka ban pynthikna ïa ka jingshngaiñ ïa ki nongïaid lynti ha Meghalaya da kaba buh jingmut ïa ka jingkylla ki jinglong jingman, ka jingjur ka jingwan rung tuh na ka ri Bangladesh, ka jingdon jong ki bor Islam kiba long ki nongshun ïa ka ri India ha katei ka ri. Kine ki dei ki mat kiba ngin sa pyntip la ngin shut pynnep ïa ki bniat jong ka MRSSA ne yn wanrah da ka aiñ kaba thymmai,” ong u Bah Paul.
Ha kaba ïadei bad ka MRSSA, u la pyntip ba ki don ar tylli ki jingkylli ba la buh da u Lat bad ka sSrkar ka la rai ban ai noh shen ïa ka jubab jong ka.
“Ki ar tylli ki jingkylli ki long, hato ka jingdon ïa ka Facilitation Centre kan khanglad neem ïa ka jingïaid ki kali, hato kan wanrah ïa ka jingshah pyndik, nangta ka la don ruh kane ka shaphang ka bynta jong ka MRSSA kaba la kdew ïa ki nongpynthud ïa ka imlang sahlang, namarkata kumno, kaei ka jingbatai ïa ki nongpynthud pyrshah ïa ka imlang sahlang…,” bynrap biang u Bah Paul.
