Shillong, Nailar, 27: Ka Khasi Hills Autonomous District Council (KHADC) kam pat shim rai halor ka jingtyrwa jong ka Sorkar Jylla ban siew tulop ïa ki nongtrei jong ki lai tylli ki Autonomous District Council (ADC) ha ka jylla.
U Executive Member (EM) jong ka KHADC Bah Powell Sohkhlet u la ong ba ka Sorkar kam pat ai jingtip satia ïa kane ka rai sha ka District Council bad ïa ka jingpynbna la pyntip tang ha ki lad pathai khubor.
“U Chief Executive Member (CEM) ka KHADC shen un sa khot ïa ka jingïalang jong ka Parliamentary Party ka Voice of the People Party (VPP) ban ïakren halor kane ka jingtyrwa jong ka Sorkar,” u la ong.
Katkum ka jingong jong u, ha ka jingïalang yn sa shim ïa ki jingsngew bad ki jingai jingmut na baroh ki MDC kiba don ha ka liang synshar jong ka District Council.
“Ïa ka rai halor kane ka kam yn shim hadien ka jingïalang,” la ong u Bah Sohkhlet.
Haba kylli hato ka jingpynlong ïa ka jingïalang kan long beit tang halor kane ka mat, u Bah Sohkhlet u la ong ba ka VPP kan shong shwa ïa ka jingïalang jong ka Parliamentary Party shwa ban shim ïa ka rai.
Ha ka sngi Baar, u Myntri Rangbah ka jylla Conrad K Sangma u la pynbna ïa ka rai jong ka Sorkar ban thaw lai tylli ki Sub-committee ki ban ïatreilang bad ki lai tylli ki ADC- KHADC, JHADC bad GHADC halor ka jingtyrwa bad ban phah ïa ka kaiphod hapoh 45 sngi.
