Shillong, Lber 20: Ka Khasi Students’ Union (KSU) ha ka sngi Palei ka la ong ba ki hajar ngut ki dkhot jong ka kin ym reij ban leit sha phatok lada ka sorkar jylla ka thom da ka bor ban wanrah ïa ka lynti rel ha rilum Khasi bad Jaiñtia nalor ka jingbym don ki aiñ ïada na ka jingwan rung kyrthlep ki mynder ri kum ka inner line permit (ILP).
“Katba ngi dang ïakhun ban ïoh ïa ka ILP, kynsan ki wanrah pynban da ka jingtyrwa ban wanrah ïa ka lynti rel. Namarkata ngi phah ka khubor kaba sawa bad kaba shai ba kim dei ban aiding ïa ka KSU naba ngi dawa ban wanrah mardor ïa ki aiñ kiba treikam bad kiba khlaiñ ban ïada ïa ki hok bad ka bha ka miat jong ki Khasi,” ong u President ka KSU u Bah Lambokstarwell Marngar haba kren ha ka jingïalang kynmaw burom ïa ka lyngkhuh dap 47 snem jong ka seng.
U la maham, “Lada ka sorkar ka nud ban thom da ka bor, kumta ka dei ruh ban long kaba la khreh ban pynheh ïa ki district jail bapher bapher naba da ki hajar ngut ki dkhot ka KSU ki long ba la khreh ban leit sha patok. Ka KSU kam don por ban shu kren baheh tang ha ka social media, ngi bun kam ban ïakhun ha madan na ka bynta ban ïada ïa ka jaitbynriew Khasi.”
U Bah Marngar u la pynkynmaw ruh ba ka sorkar jylla ka la dep mynjur da ka resolution na ka bynta ban pyntreikam ïa ka ILP hynrei kaba sngewsih ka long ba kane ka dangsah pongdeng bad ka jingshim rai ka sorkar pdeng.
U la buh ruh ka jingkylli halor ka jingpulom ka sorkar ban pyntreikam ïa ka Meghalaya Residents Safety and Security Act (MRSSA), 2016 bad ong, “Ki paidbah kim dei ban kylli ïa kaei ba ka KSU ka la leh ban ïada ïa ka jaitbynriew Khasi hynrei kidei ruh kumjuh ban kylli ïa ki nong thaw aiñ kaei kaba ki la leh halor kane hadien ba ki la shah jied ban thaw aiñ na ka bynta ka jingïada ïa ki trai ri trai muluk.”
U President ka KSU u la pynkynmaw ba ka long ka jingïaid lynti kaba eh bha na ka bynta ka union ha kine ki jingïaid lynti ba la 47 snem bad ong, “Ngi la mad bun ki jingeh haba ngi shim ïa ki kam bapher bapher kiba ktah ïa ki trai ri trai muluk.”
U la kynnoh ba ka sorkar la ka dei ka sorkar jylla ne ka sorkar pdeng ki la pyrshang bun ki lad ban phiah ne pynpait pynpra ïa ka KSU.
“Ha u snem 2007-2009 ka la don ka jingpyrshang ban pynpait ïa ka KSU na ka daw ka kam uranium ym tang lyngba ka jingpyndonkam da ka pisa hynrei shaduh u pud ruh ban shim ka jingim ki nongïalam ka KSU. Namar kata ngi don hangne ban pynkynmaw ba ka KSU ha ki 47 ka jingdon jong ka, ka ïeng na ka bynta ka daw bah jong ki trai ri trai muluk bad ban ïada ïa ki hok jong ki.”
Lah ban ong ba ïa ka KSU la seng ha ka snem 1978 kadei kaba la seng da ka kynhun ki samla pule ban ïada ïa ki hok ka jaitbynriew Khasi lyngba ka rynsan paidbah.
Kum ka seng ki samla pule ka la trei borbah na ka bynta ka daw bah bad ka jingïatylli jong ki Khasi people, ka KSU ka la shim bynta kaba khraw ban pynkupbor na ka bynta ka jingbha ki Khasi ha baroh ki liang.
Ki samla pule na NEHU bad ki jaka pule bapher bapher ka Meghalaya da kawei ka jingthmu ki la ïalum lang ha Khasi National Durbar Hall, Mawkhar, Shillong, ban ïakren bad rai ban thaw ïa kane seng kaba la ai kyrteng da ka KSU.
Kumta la seng ïa ka KSU ha ka 20 tarik u Lber, 1978, da ka kynhun ki samla pule kiba la lum lang ïa baroh ki samla pule kiba dei na Khynriam, u Pnar, U Bhoi, U War, Maram, Lyngngam bad Diko sub-group kiba la thaw ïa ka jaitbynriew Khasi. Ka motto jong ka Union kaba la shim ka dei Mait Shaphrang Khlur Ka Ri.
