Shillong, Naitung, 11: Ka Myntri jong ka Sorkar Pdeng kaba khmih ïa ka tnat Pla Tyngka ka Nirmala Sitharaman ha ka sngi Thohdieng ka la ïaroh ïa ka saiñ pyrkhat bad ïa ki kyntien shongsbai jong ka jaidbynriew Khasi haba kren shaphang ka khaii ka pateng, ka roi ka par bad ka jingsynshar ha ka jingïalang buh mawnongrim ïa ki projek pynroi ba kongsan ha Umsawli, New Shillong.
Ka Sitharaman ka la pynpaw ïa ka jingsngewnguh ïa ka jingngeit kaba don nongrim ha ka kolshor jong ka thaiñ, da kaba ong ba kine ki nongrim ki seng ïa ka nongrim kaba don akor bad kaba neh na ka bynta ka kam khaii bad ka jingsynshar jong kane ka juk.
Ka la ban jur ïa san tylli ki kyntien shong sbai ka jaidbynriew Khasi kiba ïadei bad ki jinglong ba kongsan ha ka jingsynshar kaba don bad ka jingkitkhlieh.Ka Tip Briew Tip Blei – Ka jingpynpaw ïa ka rukom pyrkhat kaba pynshong nongrim ha ki briew kaba dei ban long ha ka phang pdeng jong ka polisi bad ka jingtrei kam.
“Kane ka jingmut ban ïohi ïa ka jinglong blei ha ka jinglong briew ka long kaba jylliew, bad ka pynpaw ïa ka rukom treikam jong ka sorkar jong ngi. Da kaba pynskhem ïa ka kam jong ngi ha kane ka nongrim, man la ka sienjam ka kylla long kaba sngewtynnad bad kaba don jingmut,” la ong ka Sitharaman.
Kamai ïa ka Hok – Ka ban jur ïa ka kamai kajih kaba hok bad ka jinglong hok ha ka kam, ka dor kaba ka la ithuh kum ka phang pdeng jong man la ka thong kaba bha.
“Ka kam kaba bha ka dei ban long kaba la pynshong nongrim ha ka hok. Ka jingsynshar ïa ki kompeni ka dei ban long kaba la pynshong nongrim ha ka jinglong ba janai,” ka la ong.
Ka Tip Kur Tip Kha – Kane ka nongrim ka pynpaw ïa ka jingdonkam jong ka imlang sahlang, ki jingïadei, bad ka jingkitkhlieh ha ka imlang sahlang ha ka khaii pateng.
“Ka kamai kajih ha ka pyrthei mynta ka dei ban pynshong nongrim ha ki jinglong ba kordor jong ka thaiñ bad ka jinglong briew. Kane kam dei shaphang ka jingkyntait ïa ka jingïaid ki kam ha kylleng ka pyrthei hynrei ban pynlong ïa ka kaba kynthup lang bad kaba lah ban neh,” ka la bynrap.
Ka Bhalang Ka Imlang – Ka la ithuh ïa kane kum ka nongrim na ka bynta ka jingpynneh pynsah bad ka jingroi lang, kaba ïadei bad ka khubor jong ka roi ka par kylleng ka pyrthei jong ka India kum “Kawei ka Pyrthei, kawei ka Longïing” bad ka “Vasudhaiva Kutumbakam.”
“Ym don kano kano ka kam kaba lah ban jop ha ka imlang sahlang ka bym seisoh. Kaei kaba pynmyntoi ïa uwei kam dei ban pynsniew ïa uwei pat”, la ong shuh shuh ka Sitharaman.
Mei-Ramew – Ki Ryngkew Ki Basa– Ka Myntri Kam Pla Tyngka ka la kren da ka jingsngewtynnat shaphang ka jingsngewkhia ïa ka mariang, da kaba kdew ïa ka jingshem jong ka ha ka jingwanna Guwahati sha Shillong.
“Ka lyer kaba khuid, ki sawdongsawkun kiba jyrngam — kane ka jingburom ïa ka mariang ka dei kaba ktah bha ïa ka mynsiem. Ka kam khaii bad ka roi ka par ki dei ban burom ïa kane ka jingngeit,” la pynpaw ka Myntri.
Ka Sitharaman ka la ong ba kine ki jinghikai jong ka jaidbynriew Khasi kim dei tangba kiba kit jingmut ha ka kolshor hynrei ki long kiba shongkun bad kiba jylliew ha ka jingpyrkhat ha ka liang ka ïoh ka kot ha kane ka juk mynta.
