Shillong, Naitung, 14: Da ki phew ngut ki dkhot bad ki nongïalam jong ka Hynñiewtrep Youths Council (HYC) ha ka sngi Thohdieng ki la tur kyndit sha ophis Main Secretariat ban pynrem ia ka Sorkar Meghalaya Democratic Alliance (MDA) ba la ialam da ka National Peoples Party (NPP) ka bym shym la lah satia ban pynioh ia ka jingdawa Inner Line Permit (ILP), ban pynrung ia ka Ktien Khasi ha ka Khyrnit Baphra.
Haba pynrem jur ia ka jingpynbna u Myntri Rangbah ka Jylla u Conrad Kongkal Sangma ba ka Sorkar ka la phaikmat mynta ban pynpoi ia ka lynti Rel ha Khliehriat, East Jaiñtia Hills District, ki dkhot ka seng ki la pyrta shla da ka sur kaba jam, “No ILP, No Railway.”
Ka seng ka la buh jingkylli ruh ia ka Sorkar halor ka jingpynslem ban pynrung ia ka ktien Khasi ha ka Khyrnit Baphra jong ka riti synshar ka ri India bad ha kajuh ka por ki dkhot ka seng ki la pynrem jur ia u MP ka Shillong u Bah Vincent H. Pala halor ka jingai jingkyrshan ban pynpoi ia ka lynti Rel ha Khliehriat, East Jaiñtia Hills District.
Ki bor Pulit hapoh ka jingialam jong u Superintendent of Police (City) bad u Additional District Magistrate u Bah Ronnie Wahlang tang shu ioh jingtip ia kane ka jingtur kyndit jong ki dkhot ka HYC sha Secretariat ki la leit mar mar ban pynsngewthuh ia ki nongialam ba kin ym ialum paidbah hakhmat ka khyrdop jong kane ka ophis treikam bakongsan jong ka Sorkar khnang ba kan ym pynthud ia ka leit ka wan jong ki kali kiba iaid lyngba nakhmat ka surok jong ka Main Secretariat.
Ki dkhot ka HYC ki bym shym pynsngap ia ka jingkyrpad jong ki bor synshar District, ki la shong kyllaiñ myngngor syndon hakhmat ka khyrdop jong ka Main Secretariat.
Ha kane ka por, katba ka kali kaba kit ia u Symbud Myntri Rangbah ka Jylla uba peit ia ka tnat Kam Pohïing u Bah Prestone Tynsong ka dang thmu ban rung sha Secretariat, ki dkhot ka seng ki la pyrta shla, “No ILP, No Rest”. Kat haduh ba la thoh ia kane ka khubor ha ka por 1:45 baje nohsngi, ki dkhot ka seng kim shym la khih satia na kane ka jaka bad ki la rah da ki plakad ban bteng ka jingpyrta ia ki sur pynrem ia ka Sorkar MDA.
