Shillong, Jymmang, 24: U Chairman bad Managing Director jong ka Reliance Industries Limited, u Mukesh D. Ambani u la pynbna ban plie ki lad aikam palat 2.5 million ki samla ha kane ka thaiñ Shatei Lammihngi.
Ïa kane u la pynpaw haba kren ha ka jingïashim bynta ha ka jingïalang bah jong ki nongbei pisa ba la tip kum ka “Rising North East Investors Summit, 2025.”
Ha kane ka jingïalangbah la ïashim bynta lang da u Myntri Rangbahduh u Narendra Modi, u Myntri ka Sorkar Pdeng u Jyotiraditya Scindia.
Haba pynbna ïa ki 6 tylli ki jingkular sha baroh ki Myntri Rangbah jong ka jylla Arunachal Pradesh, Assam, Manipur, Meghalaya, Mizoram, Nagaland, Sikkim bad Tripura u Ambani u la pyntip ba ka Reliance ka ladep bei pisa kumba T. 30,000 klur ha kane ka thaiñ ha kine ki 40 snem ba la leit.
“Ha kine ki 5 snem ban wan, ngin bei arshah da ka thong ban pynpoi sha ka T. 75,000 klur,” u la ong.
Ka ba-ar, ka Jio ka la lah ban poi sha kumba 90 na ka 100 ki nongshong shnong ha kaba ki la don palat 5 million kiba pynïasoh ban pyndonkam 5G (5G subscribers). Ngin sa leh arshah ïa kane mynta u snem.
Kaba hakhmat eh ka Jio kan wanrah ka bor ka jingkylla ha ka liang ka bor jingstad kaba la thaw lypa (Artificial Intelligence) sha baroh ki skul, ki aspatal, ki kam bapher bapher bad ha ki ïing ki sem.
Haba ki sap ki ïashem bad ki kor jingstad bad ka jinglah ka ïakynduh bad ka jingpynïasoh, ka Thaiñ Shatei Lam Mihngi jong ngi kan kiew kham shakhmat.
Ka balai, ka Reliance Retail kan kham pynbun haba kaba thied ïa ki jingbam, ki soh bad ki jhur ban kyntiew ïa ka jingïoh kamai ki nongrep jong ngi.
Ngin sa bei pisa ban buh ki karkhana ki ban pynmih ki tiar FMCG kiba bha ha kane ka thaiñ bad kyntiew ruh ïa ka ïoh ka kot ha ki kam thaiñ jingthaiñ kiba itynnad.
Ka basaw ka long ban kham pynkhlaiñ ïa ka jingpynmih bording na ka sngi ha kane ka thaiñ.
U Myntri Rangbahduh borabor u ju kren ban pynkylla ïa ki jaboh jabaiñ sha ka spah. Ha kane ka bynta, ngin sa pynkylla ïa ki jaka shrah sha ki jaka pynïoh spah da kaba buh 350 tylli ki Compressed Biogas Plant.
Ka basan, ka Reliance Foundation kan wanrah ka jaka sumar kaba bha tam ïa ka jingpang bampong ha ka Thaiñ Shatei Lam Mihngi. Kum ka jingsdang, ngi la tei ïa ka jaka sumar bampong kaba 150 jingthiah ha Manipur.
Ngi ïatreilang ruh bad ka skulbah ha Mizoram (Mizoram University) ban sumar ïa ka bampong da kaba pyndonkam ïa ki jingtip katkum ki tynrai jingtreikam ki dkhot met (genomic data).
Ha Guwahati, ngi la tei ïa ka Advanced Molecular Diagnostics & Research Lab kaba dei kawei napdeng ki jaka sumar kaba heh ha kaba ïadei bad ka Genome Sequencing Capacities ha India. Ngin ïarap ban pynlong ïa ka Thaiñ Shatei Lam Mihngi kum ka jaka pdeng ha ki lad ai jingsumar bad kum ka jaka kaba khlaiñ ha ka rukkm wad bniah
Ka bahynriew pat ka long ba ka Thaiñ Shatei Lam Mihngi ka dei ka ïing shong jong ki sap bapaw ha pyrthei ha ki kam ïalehkai kiba bun jait.
Ka Reliance Foundation kan trei rhngkat bad baroh 8 tylli ki jylla ha kane ka thaiñ ban buh ïa ki Olympic Training Centre ki ban long ki shlem ai jinghikai ban pynkhreh ïa ki samla jong ngi ki ban long ki nongjop bad wanrah ki takma ha ka jingïalehkai Olympics.
U Ambani u la ïaroh ïa u Mantri Rangbahduh da kaba ong ba u la lah ban pynpoi sha ka thong ïa kaei kaei kaba ym lah ngeit bad ym lah mutdur bad wanrah ïa ka Thaiñ Shatei Lam Mihngi sha ka pdeng jong ka map ka India ha ki kam pynroi bad ki pynsawa ki khana ha ki bynta ba hapdeng jong ka India.
“Hapoh ka jingïalam jong phi, ngi kiba don ha ki kam karkhana ngin ïatrei bad baroh ki Myntri Rangbah ban pynlong ïa ka Thaiñ Shatei Lam Mihngi kum ka nuksa ka ban ai mhnsiem bad pyni sha kiwei pat ki bynta ka pyrthei, kumno ba ngin lah ban kiew shaphrang; kumno ki kam pynroi ki ïaid ryngkat ban sumar ïa ka ei mariang; kumno ka mei longspah bad ka roi ka kiew kan poi sha baroh ki longïing bad kumno ka mei India ka kdup ïa baroh ki khun jong ka da ka jingieid bym don u pud,” u la ong shuh shuh.
