Shillong, Risaw 20: Ka Achik Concious Holistically Integrated Krima (ACHIK) ka la pynher da ka shithi sha u Secretary ka Ministry of Home Affairs ka Sorkar India ban dawa ba dei banban sam noh mardor ïa ki syrnot bad ïa ki medal jong ka Sarvottam Jivan Raksha Padak na ka bynta ki saw ngut riew shlur kiba la pyllait ïm ïa kiba ngam jyllop ha u snem 2022.
Ha ka shithi ba la soi da u President u Kebil A Sangma bad u General Secretary u Happynews R, Marak ka ACHIK ka la pynpaw ba ki longïing longsem jong ki saw ngut ki riewshlur kiba la aiti ïa la ka jingim ban pyllait im ïa kiba la ngam jyllop kaba la jia ha u snem 2022.
Ka ACHIK ka la ong ruh ba kine ki riewshlur ki la aiti ïa la ka jong ka jingim ban ïada ïa ka mynsiem briew ha kaba ki la dei ban ïap jyllop hapoh ka jinglynshop jong ka um. Ïa ka jingshlur bad ka jingaiti jong ki ladep ban pynbna lyngba ka Sarvottam Jeevan Raksha Padak ha ka shithi D.O. No. 17/8/2022-Public ha ka 30 tarik, Kyllalyngkot, 2023.
Hynrei ka long kaba sngewkhia ba ka jingai ïa ki syrnot bad ki medal sha kine ki riew shlur ka shlem palat mynta la ar snem ki la iaid. Ka seng ka la ong ba ki kyrteng jong kine ki 4 ngut kiba la ïoh ka jingithuh hapoh ka Sarvottam Jeevan Raksha Padak ki dei u Sengrik D . Sangma, u Nibath D. Sangma, u WagrikM. Momin bad Jinjash D. Marak.
Kane ka Sarvottam Jeevan Raksha Padak ka dei ka khusnam kaba la ai kyrpang kum ka jingithuh ïa ki nongshong shnong kiba la aiti ïa la ka jong ka jingim ban ïada ïa kiwei. Ïa kine ki 4 ngut la ithuh da ka sorkar halor ki kam shlur jong ki, hynrei haduh kine ki sngi kim shym la ïoh satia ïa ki syrnot bad ki medal kaba ki dei ban ïoh, wat hadpeng ba kane ka jingjia ka la dep jia ha ki 2 snem mynshwa. La ong ba katkum ka jingpynbna kaba D.O. No. 17/8/2022-Public 30 tarik u Kyllalyngkot, 2023, ïa ki kyrteng jong ki la don hapoh ka thup kiba dei ban ïoh khusnam.
Hynrei haduh mynta kim pat shym la ïoh ïa kine ki khusnam kaba ki deihok ban ïoh. Kane ka jingslem ban sam ïa ki khusnam ym tangba ka la pynduh jingkyrmen hynrei ka la ktah ruh ïa ka ïing ka sem jong ki.
Wat hadien ba ki la shah pynkup burom hapoh ki shnong ki thaw halor kane ka kam shlur jong ki, ka jingbym don ka jingithuh da ki bor ba dei peit ka la pynthylli ïa ka kam ba ki la leh bad kane ka lam ruh ka jingpynduh jingkyrmen. Kumta ka donkam ïa ka jingithuh kaba mardor da ka Sarvottam Jeevan Raksha Padak kan sa long kum ka jingkhang lad ïa ki kam ba shlur jong ki. Na ka liang jong ka seng ka la ong ba ka long kaba donkam ïa ka tnat ki Kam Pohïing jong ka sorkar pdeng ban shim khia noh mardor halor kane ka bynta naba kine ki riewshlur mynta ki la ap la palat 2 snem ban ïoh ïa kane ka jingithuh.
“Ngi kyrpad ïa ka jingshim khia ka jong phi ban buh hakhmat ïa kane ka jingtyrwa ka jong ngi ban sam noh ïa ki syrnot bad ki medal sha kine ki riewshlur bad kaba ym dei shuh ban pynslem. Namar kata ngi ban jur ïa ka jingdonkam ban pynkloi katba lah ïa kane ka kam khnang ba kine ki 4 ngut kin ïoh ïa ki khusnam lyngba ka Sarvottam Jeevan Raksha Padak kaba dei ruh ka khusnam ba ju ai sha ki riewshlur kiba la ïada ïa ka jingim jong kiwei pat ki nongshong shnong jong ka ri bad da kaba ïoh kloi ïa kane ka khusnam Sarvottam Jeevan Raksha Padak, kan ïarap ïa ka sorkar ym tang ba kan ithuh ïa ki kam shlur hynrei kan pynskhem ïa ki kam jong ka ban ithuh ïa ki kam shlur jong ki,” ong shuh shuh ka dorkhas.
