Shillong, Naitung, 20: Haduh 200 ngut ki samla pule na ka ri India, kynthup 40 ngut na ka jylla Meghalaya ha ka sngi Saitjaiñ ki la wan phai sha la ka ri da kaba rung na khappud Sonamura, Tripura hadien ba ki la mih noh na ka ri Bangladesh namar ka jingïakynad kaba jur ka la khie ha kane ka ri.
Ban pynkhreh ïa ka jingwan poi jong kine ki samla pule, ki ophisar jong ka Sorkar Meghalaya ka la ïatreilang bad ki ophisar jong ka Sorkar Tripura.
Ka Sorkar Jylla ka la ïakren ruh bad ki bor pynïaid jong ka Indian Embassy ha ka ri Bangladesh ban pynthikna ïa ka jingshngaiñ ha ka jingpynkynriah ïa ki samla pule na ki jaka ba ki sah.
U Deputy Commissioner (DC) bad u Superintendent of Police (SP) jong ka Sonamura ki la pynbiang ruh ïa ki umsoh bad ïa ki song jingbam ban sam sha ki samla pule jong ka jylla Meghalaya kiba wan phet na ka ri Bangladesh.
Nalorkata, ka Sorkar ka la pynkhreh ruh ar tylli ki Bos Super Deluxe Sleeper Coache ba la synran lang da ki Pulit ban leit shaw ïa ki samla pule na khappud Sonamura khnang ban pynthikna ïa ka jingsuk ha ka leit ka wan bad ka jingshngaiñ jong ki samla pule. Ïa ka ja miet na ka bynta ki samla pule la pynbeit lyngba u Deputy Commissioner jong ka East Jaiñtia Hills Circuit House, Khliehriat.
Ka Sorkar Meghalaya ka la thung ruh ïa ki Nodal Officer na ka Admistration bad Pulit ban peit nadong shadong.
Ka tnat I&PR jong ka Sorkar Jylla ha ka sngi Saitjaiñ ka la pyntip ruh ba ki don sa 115 ngut ki samla pule nong India kiba la wanphai sha la ing da kaba rung na Integrated Check Point, Dawki, Meghalaya.
Na kine ki 115 ngut, 8 ngut ki dei ki samla pule na kane ka jylla Meghalaya, 168 ngut na ka ri Nepal bad iwei na ka ri Canada.
