Shillong, Jymmang, 27: Ka tnat Pule Puthi jong ka Sorkar Jylla ka la buh thong ban kynthup lang hajuh ïa palat 600 tylli ki skul Sorkar bad ki skul Samagra Shiksha Abhiyan, hapoh ka wat banyngkong hapoh une u snem.
Ka jingthmu jong ka Sorkar ka long ban pynduna ïa ka jingmang pisa ban pynlut ha kaba siew tulop ïa ki nonghikai. Ïa mynta ka sorkar Meghalaya ka la pynlut palat 2400 klur ban siew tang ïa ka tulop jong ki 40,000 ngut ki nonghikai ha kaba tang 7000 hajar ngut ki dei ki nonghikai jong ki skul sorkar.
Ïa kane la pyntip da u Commissioner & Secretary uba khmih ïa ka tnat Pule Puthi u Vijay Kumar Mantri ha ka jingakren bad ki lad pathai khubor ha ka sngi baar.
“Ka nongrim jong ka SSA ka dei ka skul Sorkar. Phim lah ban don ar tylli ki skul sorkar ha kajuh ka por. Ngin hap ban kynthup lnag bad ngin sa peit haduh katno tylli ki don. Ngi la buh thong shwa 600 tylli skul hapoh u snem u snem,” u la bynrap.
U Mantri u la pyntip ba ka tnat ka pynshlur ruh ïa ki skul shimet ban sdang noh ïa kane ka jingthmu ban pynïasoh bad ka Sorkar.
Katkum ka jingong jong u, ka Meghalaya ka don palat 55,000 ngut ki nonghikai haba nujor bad kiwei pat ki jylla ha ka thaiñ Shatei Lammihngi.
“Dei na kane ka daw, ka jingmang pisa ka duna bha ban pynbha ïa ki iing skul,” u la ong.
U la pyntip ba ka tnat hapoh ka Asian Development Bank (ADB) scheme ka la shimti haduh 65 tylli ki skul ban kyntiew kyrdan bad ban shna ïa ki ing skul ba thymmai.
Haba kylli, u Commissioner & Secretary u la ong, “tang ïa ki skul, T. 2400 klur la pynlut ha kaba siew tulop ïa ki nonghikai. Na ka bynta ki College, sa T. 300 klur shi snem bad ka Sorkar ka ai jingkyrshan 40,000 hajar ngut ki nonghikai bad na kane tang 7000 ngut ki dei ki nonghikai skul Sorkar bad kiba sah ki dei ki nonghikai jong ki skul Private.”
