Shillong, Lber, 01: Ha ki jingpynap ktem ha ki bynta bapher bapher ha shilynter ka khappud Indo-Bangladesh ki shipai BSF Meghalaya ki la ïoh ban kurup ïa ki mar khaïi tuh kiba kot palat T. 61 lak.
Ha ka jingkhynra da ka jingïatreilang bad ki Pulit Meghalaya, ki shipai BSF na ka 144 Battalion ki la ïoh kurup ïa ki mar khaïi tuh ba la thmu ban shalan tuh lyngba ka khappud South Garo Hills, bad ïoh kurup ïa ki mar khaïi tuh kiba shongdor palat T. 41 lak.
Ha kawei pat ka jingkhynra, ki shipai BSF Meghalaya jong ka 4 Battalion ki la ïoh ban kurup ïa ki mar khaïi tuh kiba shongdor palat T. 20 lak hajan ka khappud jong ka West Jaiñtia Hills.
Ïa ki mar be-aiñ, ba la thmu ban khaïi tuh sha ka ri Bangladesh, la buhrieh ha kawei ka khlaw hajan ka khappud jong ka West Jaiñtia Hills bad ka South Garo Hills District. Lyngba ka jingïoh jingtip na ki tnat syntiat, ki shipai BSF Meghalaya ki la pynlong ka jingkhynra bad ïoh kurup lut ïa ki mar ba la thmu khaïi tuh.
