Shillong, Nailar, 12: U Myntri Rangbah ka jylla u Conrad Kongkal Sangma ryngkat ka jingsynran lang jong u Symbud Myntri Rangbah uba khmih ïa ka tnat Kam Pohing u Bah Prestone Tynsong ha ka Lah Sngi u Blei ki la leit ban ïakynduh ïa u Myntri jong ka Sorkar India uba khmih ïa ka tnat kam Pohïing u Amit Shah ban pynsngew ha kaba ïadei bad ka jingpynkhlaiñ ïa ka jingpahara ha khappud jong ka ri India bad Bangladesh namar ka jingïakhih kaba jur ha ka ri Bangladesh.
Ha u kyrwoh ba la phah sha ki lad pathai khubor, u Conrad Sangma u la ïathuh ba ki la shong ïa ka jingïalang pyrkhat kam bad u Amit Shah ha New Delhi ban khmih bniah ïa ka jinglong jingman jong ka khappud namar ka jingbym shong shngaiñ na ka jingïakynad ha ka ri Bangladesh.
“Ha ka jingïalang pyrkhat kam, ngi la ïathuh ïa u Myntri ba ki shipai BSF bad ki shipai India ki la pyrkhing ïa ka ïaid ka ieng ha khappud bad ki Pulit ka jylla ruh ki la peitngor bha nalor ba la pynjari ïa ka korphiw miet ha shilynter ka khapppud ban pynkhlaiñ ïa ka jingpahara ha khappud,” u la ong.
“Ngi la ïaiban ïa u Myntri ba ngim dei ban ailad ha kum kane ka por ïano ïano ruh ban jam sha shiliang u pud u sam namarba ka jinglong jingman kam shngaiñ satia bad u Myntri u la pynpaw ha ka jingïalang ba ka Sorkar India kan ym ailad ïano ïano ruh ban jam sha u pud u sam jong ka ri bad ban pynthikna ruh kan ym don kano kano ka ïaid ka ieng ha khappud,” la ïathuh u Sangma.
“Nalor kata, ngi la kyntu ruh ïa ka Sorkar India lyngba u Myntri ka tnat Kam Pohing, lada long kaba lah, ban phah shuh shuh ki bor pahara khnang ban pynkhlaiñ ïa ka jingpahara bad na ka liang jong u Myntri ruh u la ong ba un sa khmih bniah ban shim ïa ki lad ki lynti lada donkam,” la bynrap u Sangma.
