Shillong, Rymphang, 28: Ka Director General of Police (DGP) ka Jylla ka Kong Idashisha Nongrang ka la ïathuh ba ka tnat Pulit ka la lap ba ka seng kieng atiar Hynniewtrep National Liberation Council (HNLC) haba ka pynrung ïa ki dkhot thymmai ka la pan ruh ïa ki Election Photo Identity Card (EPIC) bad ong ruh ba ka tnat Pulit ka ladep pule lut ïa ki jingïakren jong ki samla kiba la shah pynngop lyngba ka Social Media.
Ha ka jingïakren bad ki lad pathai khubor ha ka sngi Saitjaiñ ka DGP ka la ïathuh ba lait na ki arngut kiba la shah kem ha ki Pulit halor ka case buh bom IED ha iew Umsning kiwei pat kiba ki Pulit ki la lap ksai ki dei tang kiba dang shu ïakren bad ki nongpynrung dkhot hapoh ka seng HNLC.
Haba kylli shaphang u Samuel Wahlang Pahsyntiew uba la pyndem ha ki Pulit ha ka 25 tarik mynta u bnai, ka DGP ka la ong, ‘ngi la leh lut ïa baroh ki jingtohkit bad u la ai ruh ka jingïatreilang bad ngi. Ym tang ba ngi la ïoh ïa ka jingdon jong ki briew ïa kaba ngam lah ban pynpaw hangne mynta hynrei ki don ki kyrteng jong ki samla lud kiba la pyndonkam shwa ban pynrung dkhot ïano ïano kano la bthah ïa ki ban phah ïa ka EPIC. Ngi la ïoh ïa ki EPIC bad ngi la ithuh ruh ïa ki briew. Haba ngi peit ïa ki jingïakren ha ka social media namarba ka jingïakren ka long beit tang ha ka social media lane tang bad ki nongpyndonkam ïa ka social media jong ka HNLC.”
Ka la ïathuh ruh ba haba ki Pulit ki tohkit na ki jingïakren la lap ba ka jingïakren bad ki samla lud kaba nyngkong eh ka long ban phah ïa ki EPIC bad kiwei kiwei hynrei kim shym la ïaid palat nangta.
“Ki don pat kiba la ïaid palat nangta, kum kito ki arngut kiba dang shu shahem na Umsning u Banjop bad u Donbok kiba la pynpaw ba ki don ka mon ban leit pynïasoh bad ka seng bad nalor kata ki donkti ruh ha kaba buh bom IED ha Umsning,” ka la ong.
Haba kylli, la ka tnat Pulit ka don jingtip neem katno ngut ki samla kiba la leit sha Bangladesh, ka DGP ka la ong, “ ngan ym lah ban ai ïa ka jingdon katno ngut, nga tharai ba kan ym ïahap bad ka jingïoh jingtip halor ka jingdon katno ngut.”
“Kawei pat kaba ki shah khring ka long ban ïoh ïa ka jingsiew kaba heh khlem pep, ka kam kaba phi leh na ka bynta ka ‘Ri bad ka Jaidbynriew’. Ki jingpynrung dkhot ki long na ki jaka sor, khap sor bad na ki nongkyndong,”la ïathuh ka Kong Nongrang.
“U don uwei uba la kham tbit. Wat ha ka mobile phone jong u Samuel Pahsyntiew ki don ki video lyngkhot kiba pyni kumno ban shna ïa ki bom IED, khamtam da ki tiar kiba suk ba lah ban ïoh,” la bynrap ka DGP.
“Dang ha u snem baladep ki don saw ngut kiba la wan pyndem namarba kaei kaba ka seng ka kular kam long kaba shisha,” ka la ong.
Lai tylli ki ksew jong ka kynhun K-9 ka tnat Pulit kiba kynthup ïa uwei u Belgian Malinois bad ar tylli ki Labrador ki la shongthait noh na ka kam hadien ba ki la ai ka jingshakri kaba la kot 30 snem na ka bynta ban ïarap ïa ki Pulit ha kaba sma dien ïa ki riew sniew, ïa ki tiar pynbthei bad ïa ki jingdih pynbuaid kiba la khein beaiñ.
Ïa kine ki lai tylli ki ksew la pynkup burom da u Symbud Myntri Rangbah ka Jylla uba khmih ïa ka tnat Kam Pohing u Bah Prestone Tynsong uba la long kum u kongsan ha ka jingïalang kaba la long ha madan jong ka MLP 1st Battalion ha Mawiong, Shillong ryngkat ka jingsakhi lang ka Director General of Police (DGP) ka Kong Idashisha Nongrang bad ki Ophisar Pulit.
Ka Director General of Police (DGP) ka Kong Idashisha Nongrang ka la ïathuh ba uwei napdeng kine ki ksew u dei uba la ïarap ïa ki Pulit ha rilum Garo ban sma dien ïa ki bom IED ba la tep da ki dkhot ka seng kieng atiar Garo National Liberation Council (GNLC) mynba kane ka seng lehnoh ka dang khie khlieh bha ha ki snem ba la leit noh ha rilum Garo.
Ka la ïathuh ba ha ka por ba la seng ïa ka K-9 Unit ha u snem 1979 ki don tang 7 tylli ki ksew bad mynta ka jingdon jong ki ksew ka la kiew sha ka 37 tylli.
Lyngba ka DREAM Mission la pynrung shuh shuh sa 24 tylli ki ksew ban ai jinghikai pyntbit. 10 tylli ki ksew la ai jinghikai na ka bynta ban ka jingtohkit ha ki kam runar, 14 tylli la hikai pyntbit ban sma ïa u drok, 11 tylli la hikai pyntbit ban lap dien ïa ki tiar pynbthei bad 2 tylli kiba la shah hikai na ka bynta ban kynrup.
