Dawa ka KSU ïa u PCCF ban kyndang naphang
Shillong, Nailar, 03: Ka Khasi Students Union (KSU) Laban Circle ha ka sngi Palei ka la aiti da ka jingthoh ha u Principal Chief Conservator of Forest (PCCF) and HoFF u R. S. Gill, ban dawa ia ka tnat Forest ba ka dei ban kyndang naphang ia ki briew kiba shna ing be-aiñ ha ka jaka jong ka tnat Forest ha Mahadev Khola.
Ha ka dorkhas ba la soi da u President u samla Reuben Najiar bad u Secretary u samla Jason Laloo, ka seng ka la aiti ruh ia ka jingthoh ba ka tnat Forest ka la ai jingbit tang ban shna ia ka Temple ha ka 5 tarik, Nohprah, 1923.
“Ka jingai jingbit ka la kren shai, “bym dei ban shna ia ki ing ki sem, lane ban pynkylla sha kino kino ki bynta ia ka jaka lane ia ka temple ba la tyrwa khlem da ioh jingbit,” la pynpaw ka seng ia ka jingthoh ba la kdew ha ka jingai jingbit.
“Ka Seng ka la kwah ban pynpaw ba ki briew kiba sah be-aiñ ha Mahadev Khola ki la nang kharoi ha kine ki khyndiat snem bad kam don kano kano ka jingpeitngor namarba ka dei ka jaka jong ka tnat Forest bad ka Dorbar Shnong ruh ka pynpaw ba kam don bor satia halor ka Mahadev Khola. Ia ki ing dewbilat, ki ing basa, bad ki dukan la shu shna khlem da ioh jingbit na ki bor ba dei peit. Ia ki jakhlia bad ki jaboh la shu pyntuid beit beit sha ka wah duid kaba don hajan kaba la pynjngut bad pynjaboh ia ka wah baroh kawei,” la pynpaw ka Seng.
“Ha kane ka jaka, la sakhi ruh ia ki jingjia ba har rukom, ki kam tuh kam thiem bad kane ka jaka ka la kylla long ka ktem jong ki briew kiba ju im kyrni ha u drok bad ka la pynsyier mynsiem ruh wat ia ki trai shnong kiba ju iaid lynti bad ia kiba sah marjan bad kane ka jaka,” la pynpaw shuh shuh ka Seng.
Ka Seng ka la pynkynmaw ruh ha u PCCF, ba ka ladep aiti ia ka dorkhas ha ka 5 tarik u Naitung, 2023 sha u Division Forest Officer, East Khasi Hills (T) Division, Shillong u I.A Mathuram.
Ka seng ka la pynpaw ruh ia ka jingpyrshah ha ka dorkhas hadien ba la lap ba ki briew kiba sah ha Mahadev Khola ki la aplai na ka tnat Forest ban pynkylla ia kane ka jaka sha ka jaka sah briew.
“Ngi pyrshah jur ia ka aplikeshon bad ka tnat Forest kam dei satia ban pdiang hynrei ka dei ban kyndang naphang ia ki briew kiba sah beain bad ban pynduh pyndam shisyndon ia ki jingtei beain khlem da pynslem namarba ka Mahadev Khola kan kylla long ka jaka rieh tngen jong ki briew kiba wan nabar,” ong u President ka Seng ha ka jingiakren bad ki lad pathai khubor hadien ka jingiakynduh ia u PCCF.
Shuh shuh u la ong, “lada ka tnat Forest ka ai jingbit ban pynkylla shnong ia ka Mahadev Khola, namar kata, ka dei ban ai jingbit ruh ia ki trai jylla ban shna iing ha ki khlaw jong ka tnat Forest.”
Ha kaba iadei bad kane, u Principal Chief Conservator of Forest (PCCF) u la iathuh sha ki nongialam ka KSU ba ka jingsorjamin bad ka jingtohkit ka dang iaid shakhmat bad lada donkam ban kyndang ia ki briew kiba sah beain ha Mahadev Khola ka tnat Forest kan sa pan jingiarap na ka ophis ka Deputy Commissioner bad na ka ophis u Superintendent of Police ka East Khasi Hills District.
