Shillong, Naitung, 02: Ka Education Cell jong ka Khasi Students’ Union (KSU) ha ka sngi Baar ka la phah ïa ka shithi sha ka Myntri ka Koit ka Khiah ka Sorkar Jylla ka Dr. Ampareen Mazel Lyngdoh halor ki mat kiba ïadei bad ka bhah pule doktor MBBS kaba ju mang da ka Sorkar Jylla na ka bynta ki samla pule manla u snem.
Ha ka shithi ka seng ka la pan jingshai na ka tnat ka Koit ka Khiah ïa ka jingdon ki Seats jong ki samla pule doktor ba ju phah da ka Sorkar Jylla sha ki jaka pule bapher bapher kylleng ka Ri India.
Na ki daw ba ju sakhi ha ki snem ba ladep, ka KSU ka la kyntu ïa ka tnat ka Koit ka Khiah ba lada jia ba ki samla kiba dei ki Khasi ne Garo, lada ki ïoh ban rung lane ki kynjoh ban poi sha ka Open Category, kum ïa kita dei ban pynrung beit sha ka Open Category, khnang ba kiwei ki samla na ki Reserved Categories ruh kin ïoh bynta lang ban rung ha ki Categories ba la bhah kyrpang ïa ki, la ong ka seng ha ka dorkhas ba la soi da u Education Secretary u samla Pynkmenlang Sanmiet.
Ka Seng, ka la ai jingmut ruh ïa ka tnat ka Koit ka Khiah, ba lada don ki samla hadien ba ki la pas ïa ka NEET exams, lada ki poi sha ka kyrdan ban ïoh rung sha ka All India Quota, kum ïa kita ruh dei ban ailad khnang ba kin don shuh shuh ki samla na ka jylla ki ban ïohlad ban leit pyntbit ha ka kam doktor.
Ka seng ka la ban jur ïa ka Sorkar ba ka jingpynbeit ïa kane ka bhah ban ïoh leit pule Doktor ka dei ban long kaba shai, kaba khuid, ba suba, bym don jingleh shiliang ne shah liang bad ym dei ban buhrieh ïa ki jingshisha, hynrei dei ban long haba shit haba shai kaban pynhun lang ïa baroh.
Ka Seng, ka wer bad ka kyrpad ïa ki shnong ki thaw, ki Hima ha kylleng ka Bri u Hynñiewtrep ban ym ai kot pynshisha lane Residential Certificate ïa ki bym dei ki paradoh parasnam, namar kane ka ktah ïa ka bhah leit pule ba la mang kyrpang ïa ki samla trai ri jong ka Bri u Hynñiewtrep.
Kum kane ka jingjia, ka la jia teng ha u snem ba ladep, ha kaba ka seng ka hap ban ieng pyrshah bad dawa pynduh bad weng syndon ïa uwei u bar jylla uba kam ba u dei u trai tri.
“Na ka bynta ka bha ka miat bad ka jingmyntoi ki samla ka ri, ka seng lyngba une u kyrwoh ka kyrmen skhem ba ka jingpynbeit ban phah leit pule doktor ïa ki samla ka r,i kan long kaba ïaid beit ïaid ryntih ha baroh ki liang bad kan nym don ka jingbuhrieh la ka long ha kano kano ka liang, ong ka dorkhas.
Ka Seng ka kyntu ïa ka Sorkar ba kam dei ban pdiang kulmar ïa ki kot ki sla jong ki bar jylla kiba mlien ban ïalam bakla bad ruh kiba kam ba ki dei ki nongshong shnong jong kane ka jylla tang ban ïoh bynta ha ka bhah leit pule doktor kaba dei hok tang ïa ki samla pule trai ri.
