Shillong, Jylliew, 24: U Director ka Tourism Bah Cyril VD Diengdoh ha ka Lah Sngi u Blei u la bthah ïa ka All Khasi Meghalaya Tourist Taxi Association (AKMTTA) ba kan ai jingkheiñ ha kaba ïadei bad ka jingwan rung jong ki kali kamai Tourist nabar ka jylla kiba wan rung sha ka Jylla Meghalaya baroh shisnem.
Kane ka jingbthah jong u Director ka Tourism ïa ka AKMTTA ka long hadien ba ki la leit ban pynsngew ha kaba ïadei bad ka jingshah ktah na ka jingphah kamai shisien shitaiew da ka tnat Tourism ka Sorkar Jylla ïa ki Bos STEMS ban kit ïa ki nongjngohkai pyrthei kiba wan kai sha kane ka jylla Meghalaya.
Ha ka jingïakren bad ki lad pathai khubor u President jong ka AKMTTA Bah Ricaldinus Dohling u la ïathuh ba ka jingphah kamai jong ka tnat Tourism da ki Bos STEMS kiba ju kit ïa ki khynnah skul ka long na ka daw ba ki Bos jong ka Meghalaya Tranports Corporation (MTC) ki la sniew.
U la ïathuh ruh ba ka seng kan sa lum ïa ka jingtip kaba bniah lyngba ki paradkhot khnang ban ïoh ïa ka jingkheiñ kaba thikna halor ka jingwan rung jong ki kali kamai Tourist na Assam bad na kiwei kiwei ki jylla sha kane ka jylla Meghalaya manla ka sngi shwa ba ka Sorkar kan dup lah ban shim ïa ka rai ban khanglad noh ïa ki kali kamai Tourist nabar ka jylla ba kin ïalam ïa ki nongjngohkai pyrthei sha ki jaka jngohkai kiba don ha kylleng ka jylla Meghalaya.
“Ha u snem baladep ngi la kyrpad ïa u Myntri ka tnat Tourism Bah Paul Lyngdoh ba un sngap lem ïa ka jingud jingnam jong ngi namarba ka jingrung kyrthep shaba palat jong ki kali kamai Tourist kiba wan nabar ka jylla ka la ktah haduh katta katta ïa ka kamai kajih ka jong ngi,” la ïathuh u Bah Dohling.
Haba kylli, haduh katno ka jingwan ki kali kamai Tourist kiba nabar ka ktah, u Bah Dohling u la ong, “shispah na ka shispah ka ktah bha ïa ngi na ka jingkamai jong ngi. Ngi ladep ïakren ruh bad ka Sorkar ban khang noh ïa ki kali kamai Tourist ban ïalam sha ki nongjngohkai pyrthei sha ki jaka jngohkai hynrei haduh mynta kane kam shym la poi shaei shaei ruh.”
Shuh shuh u la ong, “u Director u la kular ïa ngi ban buh noh kawei ka Information Centre ha Kad Liengsuiñ Guwahati khnang ba ki nongjngohkai pyrthei kiba kwah ban wan sha Meghalaya kin ïoh ïa ki jingtip kiba bniah ha kaba yn sa buh ruh ïa ki mobile number jong ki nongñiah kali kamai Tourist na kane ka jylla Meghalaya,” ong u Bah Dohling.
U la ïathuh ruh ba kaba kham pynhun ïa ka seng ka long ruh ba u Director u la kular ba ka tnat Tourism kan sa ai jinghikai kyrpang ïa ki nongñiah kali kamai Tourist ha kaba ïadei bad ka jingdonakor, ban ym dih duma hapoh kali bad kiwei kiwei de ki jingai jinghikai.
“Ngim lah ban len ba ki don ki nongñiah kali kamai Tourist kiba dih duma wat hapoh kali, kane ka ju pynwit bha ïa ki nongjngohkai pyrthei,” u la ong.
