Shillong, Rymphang 28: Ka Bharatiya Janata Party (BJP) ha ka sngi Balang ka la sdang ban lum ïa ki jingai jingmut na ki paidbah nongshong shnong ka jylla ïa kaba yn sa kynthup ha ka Manifesto ne mat ka treikam jong ka party na ka bynta ka Elekshon Lok Sabha ka ban sa long shen.
Ïa kane ka prokram la sdang ha ka sngi Baar ha kaba u President ka party u Rikman G. Momin u la thep nyngkong eh ïa ka jingai jingmut jong u.
Ka party ka wer ïa ki nongshong shnong jong ka jylla ba kin phah ïa ki jingthoh jong ki sha ka NaMO app ne da kaba shu ai Miscall ha u number 909090 2024.
Ki seng trei monsngewbha bapher bapher ruh ki lah ban phah ïa ki jingai jingmut jong ki da kaba ai ïa ka jingthoh sha ka ophis treikam jong ka party ha ki district ne ha ka jylla.
U President ka BJP Meghalaya State Unit u la banjur ba ka BJP ka ngeit ba ha ka synshar paidbah ki nongshong shnong ki dei ban mih shakhmat ban pynsngew ïa ki jingsngew jong ki bad khamtam ïa ki jingangnud bad ka BJP kum ka seng saiñhima sima ka pdiang ïa kita baroh bad dei tang ka BJP ha baroh kawei ka ri kaba ïaid ryngkat lang bad ki paidbah ban shna ïa ki mat treikam jong ka.
Lyngba kane ka prokram ka Party ka kwah ban trei da kaba ïoh ïa ka jingmynjur na ki paidbah. Bunbah ki jingangnud jong ka jylla bad ka BJP ka ailad ïa iwei pa iwei i nongshong shnong ban phylliew.
Ka seng ka la buh jingthmu ban pynpoi haduh 5000 tylli ki jingthoh halor ki mat bapher bapher kum ka jingithuh ïa ki ktien ka jylla ha ka Khyrnit Baphra, ka jingseng ïa ki Medical College, ka jingpynkiew ïa ki lad ai jingsumar, ka jingpynkha ïa ki kam ki jam na ka bynta ki khun samla bad kumta ter ter.
