Shillong, Naiwieng, 17: Ka Delimitation Committee ba la thaw da ka Khasi Hills Autonomous District Council (KHADC) kan sa pynlong da ki public hearing na ka bynta ki 23 tylli ki Constituency kum ka jingpynkhreh na ka bynta ban wanrah ia ka Delimitation Bill shwa ba ka elekshon jong ki Autonomous District Council kin long ha u snem ban sa wan.
U Chairman jong ka Delimitation Committee u Dr S. Kharsyiemlieh ha ka jingiakren bad ki lad pathai khubor ha ka sngi thohdieng u la ong ba ha kine ki Public Hearing yn sa sngap ia ki jingpynsngew bad ki jingai jingmut jong ki paidbah na ki 23 tylli ki Constituency ki ban sdang naduh ka 21 tarik Naiwieng, haduh ka 15 tarik u Nohprah.
U Dr. Kharsyiemlieh, uba long ruh u Nongbishar ba la shongthait jong ka District Council Court, u la ong ba ia ka public hearing na ka bynta ki ar tylli ki Constituency ka South West Khasi Hills, Mawkyrwat bad Langrin yn sa pynlong ha ka ophis jong ka district council ha Mawkyrwat ha ka 21 tarik Naiwieng, ha Mairang, Eastern West Khasi Hills ha ka 24 tarik Naiwieng, ha Shillong, East Khasi Hills (na ka bynta ka Sohryngkham, Mawkynrew, Nongkrem, Langkyrdem Laitkroh, Nongshken bad Mawsynram) yn sa pynlong ha ka 28 tarik Naiwieng, ha Sohra Civil Subdivision (na ka bynta ka Sohra bad Shella) yn pynlong ha ka 1 tarik, Nohprah, ha Nongpoh, Ri Bhoi (na ka bynta ka Jirang, Nongpoh, Mawhati, Umsning bad Umroi) yn pynlong ha ka 6 tarik Nohprah, ha Shillong (na ka bynta ka Mylliem, Laban-Mawprem, Nongthymmai, Laitumkhrah-Malki, Mawkhar-Pynthorumkhrah, Jaiaw, Mawlai, Mawphlang, Diengiei bad Nongspung-Sohiong) yn sa pynlong ha ka 13 tarik Nohprah, bad ha Nongstoiñ, West Khasi Hills (na ka bynta ka Nongstoiñ, Rambrai-Jyrngam bad Mawshynrut) yn sa pynlong ha ka 15tarik Nohprah.
Kine ki public hearing kin sdang naduh ka por 11 baje mynstep haduh ka por 4 baje janmiet.
“Ngi pdiang sngewbha ia ki jingai jingmut bad bad ki jingpynsngew na ki kynhun bapher bapher. Namarkata, ngi kyntu ia ki paidbah ba kin wan shakhmat ban iashim bynta ha kine ki jingpynsngew paidbah,” u la ong.
Haba kylli, u Dr. Kharsyiemlieh u la ong, ia mynta ka Mawlai ka dei kaba don ia ki nongthep vote haduh 45,000 hajar tam bad ka Laban-Mawprem ka dei kaba duna tam ki nongthep kata, tang 12,000 hajar.
U la iathuh ba ka jingthmu jong ka KHADC ia ka komiti ka long katkum ka jingthoh ba la ioh pdiang da ka council ia ka jingdonkam ban pynkynriah ia ki shnong na kawei ka Constituency sha kawei pat.
