Shillong, Jylliew 10: U Myntri ka tnat Pule Puthi ka sorkar jylla u Rakkam Sangma ha ka sngi baar u la ong ba ka jingdon jong kiba bun ki skul ka la ktah ïa ka Performance Grading Index (PGI) kaba ïadei bad ka jingïoh kyrdan jong ka jylla.
“Namar kata, ka long kaba shai ba ngi kwah ban pynduna ïa ka jingdon bun tylli ki skul ha ki kyrdan bapher bapher bad ban pynthikna ba kin don tang laitylli ki kyrdan ki skul, ba kynthup ïa ki skul sorkar, ki jaka pule ba ïoh jingïarap na ka sorkar bad ki skul shimet, namar ka la ktah shibun bha ïa ka jingïoh kyrdan PGI jong ka jylla,” ïathuh u Sangma sha ki lad pathai khubor hadien ba u la pynïaid ïa ka jingïalang ïasyllok bad ki nongthaw aiñ na ka seng United Democratic Party (UDP) halor ka jingtyrwa ban pyntreikam ïa ka Meghalaya Education Grant (MEG).
“Kum ka nuksa hapoh ka shnong jong nga, ka don kawei ka skul SSA, kawei ka skul sorkar upper primary, kawei ka deficit secondary school bad ka skul shimet ka higher secondary school, baroh ki don ha kawei ka phyllaw, ki pyndonkam kajuh ka paiñkhana, ka library, computer lab, basketball court, ka madan ïalehkai, kawei ka PHE tank, hynrei hakhmat ka ministry ki don 4 tylli ki skul bapher bapher hynrei ha ka jingshisha pat ka dei tang kawei ka skul kaba don 4 tylli ki rukom pynïaid kam,” u la ong da kaba bynrap ba namar kata ïa ka jingïoh kyrdan PGI ka hiar bha naba kawei pa kawei na ki 4 tylli ki skul ki ai tang 25 percent ha ka jaka ban ai 100 percent lada ki la ïasohlang baroh kum kawei ka skul,” u la ïathuh.
U Sangma u la pyntip ba ka jingïasyllok bad ki MLA ka long halor ka MEG, kaba wad ban pynbha ïa ki rukom pynïaid kam hapoh ka tnat pule puthi.
“Hapoh ka jingïalam jong u Myntri Rangbah ka jylla, ngi la don ha ka kam ban pynbeit ryntih ïa ka tnat Pule puthi. Ka long kaba shai ba ngi kwah ban pynduna ka jingdon ki skul ha ki kyrdan bapher bapher bad ki nonghikai bad kumjuh ruh ban pynbeit thymmai ïa ka jingïarap bei pisa ïa ki skul,” u la ong.
U Myntri u la ïathuh ruh ba ki MLA ki la ïaroh ïa kane ka jingtyrwa jong ka sorkar bad ki la ai ruh ïa ki jingmut ba shongdor haba ïadei bad kane ka kam.
“Kane ka jingpyrshang ban pynbeit ïa ka tnat pule puthi kan sa long ka jingtreikam ban sah kynmaw lada ka long kaba jop bad kaba ïaid beit bha,” u la bynrap.
Shuh shuh, u Sangma u la ïathuh ruh ba ka tnat ka la dep ban thaw ïa ka Consultation Committee ka ban khlieh da u secretary ka education u Swapnil Tembe.
“Kane ka committee kan ïakynduh ïa baroh ki riew paidbah, kynthup ïa ki tnat sorkar, ki khieh ki jaka pule ha kylleng ka jylla,” u la ong da kaba bynrap ba ka sorkar kan sa khmih halor kane ka kam hadien ba la dep ban kynduh ïa baroh bad ban ïoh ka jingmynjur jong baroh.
“Ha kine ki 50 snem ba la leit kane ka la long ka jinglong jingman bad ka jinglong jingman ha ka jylla haba ïadei bad ka pule puthi. Kumta hapoh ka jingïalam jong u Myntri Rangbah, ngi kwah ban sdang, ban pynbha bad ban pynbeit kaba ngi donkam ban leh,” bynrap shuh shuh u Sangma.
 | ReplyForwardAdd reaction |
