Shillong, Risaw 05: Ka Hynñiewtrep Integrated Territorial Organisation (HITO) ka la thoh sha u Chief Secretary ka sorkar jylla u Shakil Ahamed ha kaba ka la pan ïa ka jingpynshai kaba mardor halor ki jingmih ki jingkulmar kaba ïadei bad ka jingpyntreikam ïa ka bhah pule ka jylla ha ka kam pule MBBS ha ka jylla.
Kane ka jingthylli ka la mih na ka jingbym don ka jingshai, ki rukom treikam kiba la pynshong aiñ kiba ïadei bad ka bhah pule ha ki jingpule higher bad professional education naduh ba la kha ïa ka jylla Meghalaya.
Kane ka kam ka la ïaid mynta lah da ki phew snem, naba ka sorkar ka shaniah beit ha ka jingleh kaba ïa mynjur lang khlem da ka don ka rukom treikam kaba dei ne ka jingpynbna.
Kane ka la lam sha ka jinglong bym thikna hapdeng ki samla pule bad ki jaka pule shaphang ka nongrim kaba shong aiñ ka rukom bhah kumba ka long mynta.
“Haba buh hakhmat ïa ka jingdonkam kaba kyrkieh ïa ka jingpynrung klas bad ka rukom ka bym thikna halor ka bhah pule, ka HITO ka kyrpad ïa ka jingpynshai kaba mardor halor ka aiñ kaba shai ne ki rukom shna ïa ki rukom treikam ha kaba kane ka bhah MBBS State Quota kaba mynta kaba la pyntreikam ka don ne em ïa ka jingpynbna kaba wan na ka sorkar, ka jingmynjur ka Kynhun Myntri ne ki kyndon kiba don ban aibor ïa ka bhah pule ha ki higher bad professional bad la ka sorkar ka thmu ban pynmih ïa ka codified Reservation Policy ban ïada na ki jingbakla ne kulmar jingmut hadien habud halor ki kam pynrung klas,” ong u President ka HITO u Bah Donbok Dkhar ha ka shithi ba la phah sha u CS.
“Ka jingpynshai kaba biang por napoh ka ophis jong phi ka long kaba donkam khnang ban pynneh ïa ka jingkhuid ka jingshai bad kumjuh ruh ban ïada ïa ka bha ka miat jong ki spah ngut ki samla pule kiba mad ïa ka jingsah ha lyier ka pule puthi jong ki. Ngi shaniah ha ka ophis jong phi ba phin shim ïa kane ka kam kaba long kyrkieh,” u la bynrap.
U Bah Dkhar u la phai ruh sha ka hukum ka Meghalaya High Court kaba la pynmih ha ka 15 tarik u Nailur, 2023, kaba ïadei bad ka shithi na ka sorkar kaba 13 tarik Nailur, 2023.
“Da kaba burom, kane ka jubab ka la nang pynjynjar shuh shuh ha ka jaka ban pynbeit ïa ka. Ka jingbteng ban shaniah ha ka “conventional practice” khlem don ka aiñ ne rukom treikam kaba dei, ki jingdon ki kyndon ne ka jingpynbna na ka sorkar ka la pynlong ïa ki samla pule, ki jaka pule ban ym sngewthikna shaphang ki nongrim ka aiñ halor ka bhah kam kaba mynta,” u la ong da kaba bynrap ba kane ka jingthylli ka la don naduh ka por ba la ïoh ïa ka jylla lajong, ha kaba kane mynta pat ka ktah beit beit ïa ka lawei ka pule ka puthi ki samla kiba don ka hok ban ïoh leit pule MBBS.
