Shillong, K’ Lyngkot, 08: Ka jingmih ki jingpyrshah na ki ar Dorbar Shnong kata ka Umphyrnai bad Ur Masi-U-Joh ïa ka jingthaw shnong thymmai kaba la tip kum ka Mawsaw da ka Khasi Hills Autonomous District Council (KHADC) ka la pynlong ïa u MDC jong ka Nongkrem Constituency u Bah Lambor Malngiang ban pan jingshai na u Chief Executive Member jong ka Council u Pynïaid Sing Syiem ha ka sngi Balang.
Haba kren sha ki lad pathai khubor, u Bah Lambor u la ong ba ïa ka jingpynjari hukum thaw shnong thymmai ïa ka Mawsaw la soi da u Bah Pynshngain N Syiem ha ka por ba u dang long kum u Dy Chief Executive Member (DyCEM) ka Council uba khmih ïa ka tnad Elaka Admistration.
U la ong ba katkum ka KHAD (Administration of Elaka) Act, 1991 ka KHADC katkum ka Section 3 la kdew ba ban thaw shnong thymmai donkam ka jingmynjur ka shnong kmie. Da kaba pynpaw ba un sa phah jingthoh biang sha u Chief Executive Member, u Bah Lambor u la ong ba un sa ïakren bniah bad ki ar dorbar bad kumjuh bad u Syiem ka Hima Khyrim halor kane ka kam.
Kum ban shu kdew ba ha ka 7 tarik mynta u bnai u Bah Pynïaid haba kren sha ki lad pathai khubor halor ka jingpyrshah kitei ki ar shnong, u la ong ba mar ïa ïohi ïa ki jingkynnoh u la wad bniah ha kaba la shem ba ka jingpan shnong da ka Kur Kharkongor ka dei kaba naduh u snem 2016 da kaba bynrap ba ka kam bishar ka dei ha ka Council.
U la ong ba hadien ka jingpyrshah na ki ar dorbar shnong halor ka jingdawa thaw shnong, ka Council ka la khot Hearing bad la phah wanrah ïa ki kot ki sla ha kaba ka ophis ka shem ba ki biang lut ki kot ka Kur Kharkongor bad kumta ka la leh la ka kamram ban pynshkem.
Dang ha ka 2 tarik mynta u bnai ka Dorbar Shnong Ur Masi U Joh ka la kynnoh ba ka jingthaw shnong thymmai kaba la tip kum ka Mawsaw da ka KHADC ka dei tang ka buit arsap u Bah Pynïaid Sing Syiem ba un jop ïa ka elekshon MDC ban wan na Nongthymmai.
U Sirdar ka Shnong Ur Masi U Joh u Bah P Wankhar, u la ong ba ka jingthaw shnong ïa ka bynta jaka kaba dei hapoh u pud synshar ka shnong bad kaba la kam da ki kur Kharkongor na Nongthymmai bad Pohkseh hi ka dei ka bym ïahap satia.
U la kynnoh ba ka dei tang ka jingïasylla u Bah Pynïaid bad ka Kur Kharkongor tang ba un ïoh jingkyrshan elekshon namarba u Bah Pynïaid un ïa aireng na Nongthymmai Constituency kumba la pynbna da ka NPP ym shuh na ka Constituency kaba u mih khmat mynta kata na Sohryngkham.
Ka jaka kaba la ithuh shnong thymmai ka tyngkhuh lang ruh bad ka shnong Umphyrnai kaba dang shen lyngba ka dorbar ha ka 23 tarik, Nohprah, 2024 ka la pyrshah ïa ka jingleh jong ka KHADC bad shim ïa ka rai ban ym ïashim bynta shuh ïa ka elekshon MDC ban wan.
Ka rai pynjari hukum ithuh shnong ïa ka Mawsaw ka la mih ha ka 13 tarik, Nohprah, 2024, kaba dei ruh ka sngi kaba ha ka por janmiet u Bah Pynshngain N Syiem u la resaiñ na ka kam Dy Chief Executive Member.
Ka Mawsaw, la ong ba sha ka liang ka diang jong ka surok na Lad Smit sha Smit ka hap ha ka shnong Umphyrnai katba sha ka liang ka mon pat ka jaka kaba kham bun bad ka hap ha ka Dorbar Shnong Ur Masi U Joh.
