Shillong, Rymphang, 05: Ka Hynñiewtrep Youth Council hapoh ka jingïalam jong u Secretary ka Education Cell u Bah Enlang Sawian ha ka Sngi Balang ka la leit ban ïakynduh ïa u Commissioner and Secretary jong ka tnat Pule Puthi u Vijay Kumar Mantri ban pan jingpynshai ha kaba ïadei bad ka jingpynbna lait kam da ka Meghalaya Education Recruitment Board ha ki Kolej Sorkar ha kaba ïadei bad ka post Asst. Proffessor/Lecturer ha ka sobjek Khasi, sobjek Garo bad kiwei kiwei ki sobjek.
Haba kren sha ki lad pathai khubor, u Bah Enlang Sawian u la ong ba ka seng ka la buh jingkylli, ba kumno ka Meghalaya Education Recruitment Board ka buh ha ka kyrdan Un-Reserve ïa kawei ka post na ki 9 tylli ki kam hikai ha ka post Asst. Proffessor/Lecturer ha ka sobjek Khasi bad kawei ka Un-Reserve na ki 10 tylli ki post ha ka kam hikai ha ka post Asst. Proffessor/Lecturer ha ka sobjek Garo.
Une u nongïalam ka seng, u la ong ba u Commissioner and Secretary jong ka tnat Pule Puthi u Vijay Kumar u la pyntip ba ïa kane la leh katkum ka Roster System da ka tnat Personel ka Sorkar Jylla bad ha kajuh ka por u la ong ba ka seng ka dei ban pynbeit noh mardor ïa kane.
