Shillong, Naitung, 22: Ka Iingbishar Meghalaya High Court ka la bthah ïa ka Sorkar Jylla, ka Sorkar Pdeng bad ïa u nongmudui ba kin thep ïa ki Affidavit lyngkot ha ka mukotduma Public Interest Litigation (PIL) kaba ïadei bad ka jingïada bad kyntiew ïa ka hok jong ki jaidbynriew rit paid ha kane ka thaiñ.
Ïa kane ka PIL la ujor da ka Meghalaya Linguistic Minority Development Forum, kaba kyrpad ban pyntreikam ïa ka Article 350B jong ka Riti Synshar ka Ri India. Katkum ka Article ka bthah ban ai jingïada bad ban kyntiew ïa ka hok jong ki ritpaid ha ka ktien.
“Ïa u nongmudui, ka Sorkar Jylla bad ka Sorkar Pdeng la bthah ban thep ïa ki Affidavit (jubab) ba lyngkot bha kiba pynpaw ba haduh katno kane ka Ïingbishar ka don ïa u pud u sam ban bishar ïa kane ka mukotduma, ban pyrshang bad ban rai ïa ka PIL, ha kaba ïadei bad ka jingsahteng jong ka “Writ Petition(Civil) No. 836 of 2020: Ashwini Kumar Upadhyay vs Union of India and others” hapoh ka Iingbishar Supreme Court. Ïa ki affidavit dei ban thep shwa ka tarik ba ban shong bishar biang,” la ong ka Division Bench kaba kynthup ïa u Chief Justice IP Mukerji bad u Justice W Diengdoh ha ka hukum ba la pynmih ha ka sngi Baar (22 tarik Naitung).
Ïa kane ka mukotduma la buh sngi ban shong bishar biang ha ka 12 tarik, Nailar, ynda la thep ïa ki affidavit (jubab).
