Shillong, Jylliew, 13: Ka Iingbishar Meghalaya High Court ka la aipor ïa ka Sorkar Jylla ban phah ïa ka kaiphod halor ka jinglah ban khanglad ïa ka jingpom be-aiñ ïa ki dieng ha kylleng ka jylla shwa ka 24 tarik mynta u bnai.
Ha ka hukum ba la pynmih ha ka sngi Palei, ka Division Bench ba kynthup ïa u Chief Justice IP Mukerji bad u Justice W. Diengdoh ka la ong, “katkum kane, ngin pynkynriah noh ïa kane ka Public Interest Litigation haduh ka 24 tarik, Jylliew, 2025 khnang ban ailad ïa ka Jylla ba kan ai ïa ka kaiphod. La kumno kumno ka jingsdang ïa ka kam bad katto katne ki kam ba ladep leh dei ban pynpaw ha ka kaiphod.
Ka Public Interest Litigation (PIL) ha kaba sdang ka la pan hukum na kane ka Iingbishar ban pynsangeh ïa ka jingpom dieng beaiñ ne ha ki bynta jong ka Lower New Colony, Laitumkhrah.
Hadien kata, ka ïingbishar ka la rai ban pynïar shuh shuh ïa ka Writ Petition ban kynthup ïa baroh kawei ka East Khasi Hills District bad hadien pat la kynthup ha baroh ki district jong ka jylla.
Da ka hukum ba ka la pynmih ha ka 9 tarik, Ïaiong, 2025, ka Bench ka la bthah ïa ka jylla ban phah ïa ka kaiphod ha kaba ïadei bad ka jingpyntreikam ïa ka hukum ban pynsangeh ïa ka jingpynkhyllem be-aiñ ïa ki dieng.
Hynrei, kam shym la don kano kano ka jingpynikam haduh mynta namarba ka jylla kam shym la ai satia ïa ka kaiphod. Mardor, u Additional Advocate General, Bah ND Chullai u la kyrpad ïa ka Iingbishar ban aipor ba un phah ïa ka kaiphod.
