Shillong, Naiwieng, 18: Ka Iingbishar Meghalaya High Court ka la bthah ïa ka Khasi Hills Autonomous District Council (KHADC) ba kan pynkhreh ïa ka thup ba bniah jong ki post ba la mang bad ki nongtrei, kynthup ïa ki nongtrei Casual ha ki kyrdan bapher bapher hapoh shi taiew.
Ïa kane ka hukum ba la mynjur da ka Bench ba la khlieh da u Justice HS Thangkhiew hadien ba la sngap ïa ki jingujor, kiba don palat 30 tylli, kiba la mudui da ki nongtrei kiba tynjuh ïa ka rai jong ka Executive Committee ba la ïalam da ka VPP ha KHADC ban weng noh ïa ka jingpynbeit ryntih ïa ki kam jong ki.
“Ha ka jingbishar, ka paw ba ka don ka jingdawa ban pynkhreh ïa ka thup ba bniah da ki nongshah kynthoh jong ka District Council kumno katno tylli ki kam ba la mynjur kiba don bad ka jingdon ki nongtrei ha kawei pa kawei ka kyrdan, kiba la thung pyrshah ïa kine ki kam ba la mynjur. Ka jingdonkam kaba kham bniah ka long ban aiti ïa ka thup ba kyrpang jong ki nongtrei kiba ïadei bad baroh ki nongtrei jong ka District Council, khamtam ïa ka jingdon jong ki nongtrei Casual kiba trei ha ki kyrdan bapher bapher,” la ong ka Bench.
Ka la ai por shi taiew ïa ka KHADC ban pynkhreh ïa ka thup, kaba dei ban kynthup ïa ki jingtip ba bniah jong ki nongtrei Casual kiba shakri ha ki kyrdan bapher bapher.
Ïa kane ka kam la buh sngi ban shong bishar biang ha ka 1 tarik, Nohprah, 2025.
“Ka hukum ba shipor (ban pynsangeh ïa ka jingpyndam noh ïa ka jingpynskhem ïa ki nongtrei ba shipor) ba la mynjur mynshwa kan dang bteng haduh ban da mih kiwei pat ki hukum,” la bthah ruh ka Bench.
