Shillong, Jymmang, 08: Ka Iingbishar Meghalaya High Court ha ka sngi Palei ka la bthah ïa ka Jylla ban phah ïa ka kaiphod kaba pynpaw lada don kano kano ka jingtyrrwa ban pynbun ïa ka jingdon jong ki lum jingtep na ka bynta ki dkhot jong ki kynhun Khristan.
Ka Bench kaba kynthup ïa u Chief Justice IP Mukerji bad u Justice W Diengdoh ka ong, “la bthah ïa ka jylla ba aiti ïa ka kaiphod ban pynpaw hato ka la don la neem ne ka jingtyrwa ban pynbun ïa ki lum jingthep na ka bynta ki dkhot jong ki kynhun Khristan.”
Ka bench haba shong bishar ïa ka PIL ba la ujor ha kaba ïadei bad jingthang ïa ki metïap jong ki briew kiba dei na ka jaidbynriew Khasi bad Jaiñtia bad kumjuh ruh ïa kito kiba dang ksoh ha ka niam Hindu ha baroh kawei ka jylla, ka la rai ban pynïar ïa ka jingkhmih ban kynthup lang ïa ki kynhun Khristan hadien ba la shim ïa ka Judicial Notice na ka jingïoh jingtip ba ki kynhun bapher bapher na ki Balang Khristan ki mad ïa kajuh ka jingeh ban tep ïa ki bahaing hasem kiba la khladnoh ha lum jingtep.
“U lum jingtep la pynïaid da kawei ka kynhun niam ym shym la shah ban tep ïa ka metïap jong ki briew kiba dei na kawei pat ka kynhun niam. Kane ka paw ha kiba bun ki bynta jong ka jylla, ki bahaiing hasem ki hap ban leit sha ka jaka ba kham jngai ban pyndep ïa ka lehniam leh rukom ba khatduh na ka bynta kiba ïap. Ka la don ruh kajuh ka jingdonkam ban ïasam lang ïa u lum jingtep bad na ka bynta ban ai jaka tep thymmai ban pyndonkam kum ki lum jingtep na ka bynta ki kynhun Khristan,” la ong ka Bench.
Ka Bench ka la bthah ïa u Amicus Curiae N. Syngkon ban pynlong ïa kijuh ki jingïalang bad ki District Magistrate ryngkat lang bad ki dkhot jong ki kynhun ban weng ïa kane ka jingeh ba la mad da ki kynhun Khristan bad ban aiti ïa ka kaiphod.
Ïa mynta, ngi bthah ïa u Amicus Curiae ba ngi la thung ba un pynlong ïa ki jingïalang bad ki District Magistrate bad ki nongmihkhmat jong ki kynhun khnang ban ïapynbeit kynthup ruh ban ïa sam bynta lang ïa ka jingtep briew ha u lum jingtep.
Ha ka hukum ba la pynmih ha ka 8 tarik, Ïaiong, ka Bench ka la buh jingkynmaw ruh halor ka jingtyrwa jong ka Sorkar ban shna ki jaka thang metïap briew ha ki bynta bapher bapher ka jyllla hynrei kane kan dang shim por.
