Shillong, Naiwieng, 27: Ka Meghalaya Human Rights Commission (MHRC), Shillong ka la shim suo motu halor ka jingbym ioh tulop hynriew ngut ki nongtrei kontrak jong ka tnat Transports ha South Garo Hills District, katkum ka khubor ba la pynmih ha kawei na ki Kotkhubor Phareng ha ka 24 tarik mynta u bnai.
Katkum kane ka khubor, kumba hynriew ngut ki nongtrei kontrak jong ka tnat Transport ha South Garo Hills la kynnoh ba kim shym la ioh ia ka tulop la palat ar snem kynthih ha kaba uwei na ki nongtrei u la khladnoh khlem da ioh satia ia ka bainong kaba palat 20 bnai kaba dang dei ban siew ia u.
Ka Commission ka la phah ia ka notis sha u Chief Secretary ka Sorkar Meghalaya ban pynlong ia ka jingtohkit halor kane ka jingjia bad ban phah ia ka kaiphod kaba bniah sha ka Commission hapoh 15 sngi, ong u Secretary jong Meghalaya Human Rights Commission ha u kyrwoh ba la phah sha ki lad pathai khubor ha ka lah sngi U Blei.
