Shillong, Naitung, 8: Ka Meghalaya Human Rights Commission (MHRC) ka la bthah ïa u Superintendent of Police (SP), East Khasi Hills ban aiti ïa ka kaiphod halor ka jingkynnoh ba pynshitom beiñ ïa uwei u samla ha thanat Sohra Police Station shwa ka 31 tarik, mynta u bnai.
Haba pyntip ïa kane ha ka sngi Baar u Chairperson ka MHRC u (Retd) Justice T Vaiphei u la ong ba ka Commission kan sa shimkhia shuh shuh tang shu ïoh pdiang ïa ka kaiphod na u SP.
Ka Commision ka la ïoh pdiang ïa ka jingujor ha ka Lah Sngi u Blei na ka Kong Mildred Jyrwa ha kaba la kynnoh ba u khun jong ka u la shah pynshitom beiñ ha Sohra Police Station.
Ha ka Lah Sngi u Blei ka Kong Mildred Jyrwa ka Kmie jong u samla Getwin Jyrwa ka la ujor sha u SP ka East Khasi Hills bad sha ka Meghalaya Human Rights Commission (MHRC) da kaba kynnoh ba u khun jong ka u la shah pynkheiñ ka hok longbriew manbriew da kaba pynshitom beiñ ha ki Pulit ha Sohra Police Station.
Katkum ka ujor, ka Kong Jyrwa ka la pyntip, “ha ka 3 tarik, Naitung, 2025, haba la bna ba ki Pulit ka Sohra Police Stationm ki la wad ïa u khun jong nga, u Getwin Jyrwa, 19 snem, da lade kum ka kmie nga leit ïalam ïa u Getwin ha thanat ha ka por 9:00 baje mynstep, hynrei kaba pynlynngoh ha ka por 3:00 baje noh sngi ynda nga leit shaw u khun u la mynsaw bad nga la ïalam ïa u sha Sohra CHC bad nangne la phah ïalam ïa u ban leit sumar ha Shillong Civil Hospital bad u dang don sha hospital ban shah sumar bad yn sa pyllait ïa u haduh ka 7 tarik, Naitung, 2025.
“Ka jingujor jong nga ka long halor ka nongrim ba lada u khun jong u leh ïa ka kam runar kaba shyrkhei dei ban pynshitom katkum ka lynti jong ka aiñ ba ki Pulit ki dei ban bud. Ka jingpynshitom ha thanat bad ka jingpyllait noh ïa u khun jong nga ha kajuh ka sngi ka pyni ba ki Pulit ki pynkheiñ pyrshah ïa ka hok longbriew manbriew jong u khun jong nga kat haduh ba ka la ktah ïa ka bor pyrkhat bad ïa ka bor met jong u,” la pynpaw shuh shuh ka kmie ha ka jingujor.
“Nga buh ïa kane ka jingujor pyrshah ïa ki Pulit kiba donkti ban pynkheiñ ïa ka hok longbriew bad nga kyrpad ïa phi ban leh ïa kaba donkam na ka liang jong phi,” la kyrpad ïa ka Kmie ïa ka MHRC bad ïa u SP.
