Shillong, Jylliew, 23: Ka Khun Hynñiewtrep National Awakening Movement (KHNAM) ha ka Lah Sngi u Blei ka la kyntu ïa ka Sorkar Jylla ba kan phah lem ïa ka kopi jong ka kaiphod ba ladep aiti da ka Committee on the State Reservation Policy ba la khlieh da u Justice (Retd) M C Garg kum u Chairperson bad u Justice (Retd) Dr. Satish Chandra, u Prof D V Kumar Prof. Chander Shekhar bad u Prof. Subhadip Mukherjee kum ki dkhot.
Ka Sorkar ka la thaw ïa ka Committee on the State Reservation Policy ban khmih bniah biang ïa ka Reservation Policy kaba mynta hadien ba ka la mih ka jingdawa ba dei ban pynkylla noh ïa ka polisi.
“Baroh ki seng saiñpyrthei, ki sengbhalang bad kiwei kiwei ki kynhun ki la ïakynduh ïa ka Committee bad aiti ruh ïa ki jingai jingmut bad ki jingpynsngew. Kum ka party ngi sngewdei ba ïa ka kopi jong ka kaiphod ba la aiti da ka Committee dei ban phah lem sha ki seng saiñpyrthei khnang ba kin dup lah ban pule bniah bad ban phah ïa ki jingai jingmut kiba kham bha shuh shuh sha ka Sorkar lada donkam,” la ong u Working President ka KHNAM u Bah Thomas Passah ha u kyrwoh ba la phah sha ki lad pathai khubor.
