Shillong, Lber, 03: Ki MLA na South Garo Hills District ki la rai ban kyrpad ïa u Myntri Rangbah ka Jylla u Conrad K. Sangma ban ïakren bad ka Sorkar Pdeng ba kan pynpoi noh ïa ka lynti Rel sha Baghmara.
Haba pyntip ïa kane ha ka Lah Sngi u Blei, u Myntri ka Sorkar Jylla Rakkam A. Sangma u la ïathuh ba ma u ryngkat lang bad saw ngut kiwei pat ki MLA na South Garo Hills District kin sa ïakynduh ïa u Myntri Rangbah ka Jylla ban aiti ïa ka dorkhas na ka bynta ban pynïasoh ïa ka lynti Rel na Guwahati sha Mendipathar sha Baghmara bad wat shaduh Dhaka, Bangladesh.
“Kane kan sa long ka khyrdop na ka bynta ka khaii ka pateng ha ki snem ki ban sa wan namar ha shwa ban ïoh ïa ka jinglaitluiid ka ri India khamtam ha South Garo Hills, ngi ju ïakhaii,” la ong u Rakkam.
Da kaba kdew ba ka ri America ka riewspah namarba ka don ïa ki surok kiba bha u Rakkam u la ong, “namarkata ka jingpynïasoh ha ka leit ka wan ka long kaba kongsan na ka bynta ban kyntiew ïa ka roi ka par ha ka thaiñ.”
“Ngin sa kyrpad ïa u Myntri Rangbah ban ïakren ïa kane bad ka Sorkar Pdeng na ka bynta ban pynpoi ïa ka lynti Rel sha Baghmara bad shaduh Dhaka,” la bynrap u Rakkam.
Ha kajuh ka por u la pynpaw ruh ba ka jingbuh ïa ki Integrated Check Point ka long kaba kongsan bha khnang ban peitngor bad ban pyrkhing ïa ka jingwan rung kyrthep jong ki mynder shapoh ka South Garo Hills District.
