Shillong, Nailur, 03: Watla ka shnong Nongthymmai ka dei ka shnong kaba don hapoh ka jylli jong ka nongbah Shillong hynrei ka long kaba sngewlyngngoh ban tip ba kane ka shnong kam ïoh satia ïa ki skhim bapher bapher na ka Sorkar Jylla hynrei lait noh tang na ka skhim MLA.
Ka Synjuk ki Nongsynshar Shnong ka Nongthymmai Pyllun ba la lamkhmat da u President u Bah Bantylli Nari ryngkat ka jingsynran lang jong u Chief Executive Member (CEM) ka Khasi Hills Autonomous District Council (KHADC) u Bah Pynïaid Sing Syiem ha ka sngi Baar ki la leit ban ïakynduh ïa u Symbud Myntri Rangbah ka Jylla u Bah Prestone Tynsong ban pynsngew ha kaba ïadei bad ka jingïoh duna shaba palat ïa ki skhim pynroi ha ki shnong kiba hap hapoh ka Nongthymmai Pyllun.
Ha ka jingïakren bad ki lad pathai khubor, u Bah Bantylli Nari u la ong ba ka Nongthymmai Pyllun kam dei satia ka shnong kaba hap hapoh ka Urban ne Municipal bad dei na kane ka daw ba ki song pynroi bapher bapher kum ka skhim Jal Jeevan Mission, ki surok, ka skhim MGNREGA, ka koit ka khiah bad kiwei kiwei ki kam pynroi kim da ïoh bha kumba ïoh kiwei pat ki shnong kiba hap hapoh sor ne nongkyndong.
U la pyntip ruh ba ka Nongthymmai ka dei ka shnong kaba hap shabar jong ka Municipal Board bad bunsien kam juh ïoh ïa kino kino ki skhim ban pyntreikam lait noh tang ka MLA Scheme ba la mang da u MLA.
Ka Synjuk ka la kyrpad ïa u Bah Prestone ba un pynsngew ïa kane ka mat sha ka Sorkar Jylla ban kynthup ïa ka Nongthymmai hapoh ka C&RD Block khnang ban ïoh ïa ki song pynroi ha ka liang ka umbam umdih, ka surok. “Ha kaba ïadei bad ka Greater Shillong Water Supply Scheme (Phase-I) ruh ngim shym la ïoh um haduh katta katta bad ha ka Phase-II ruh tang katto katne tylli ki shnong kiba ïoh ïa ka um hynrei ym baroh ki shnong kiba hap hapoh ka Nongthymmai Pyllun kaba don 15 tylli ki shnong, la ong u Bah Nari.
“Ha kaba ïadei bad ka jot ka pei ha ki shnong ki thaw, la ka long ïa ki nala, ki lynti ki syngkien ngi la ïakren bad u Symbud Myntri Rangbah. Ngi dei kiba don hapoh Sor hynrei ngim don pat ïa ki PHC ne CHC hynrei ngi don tang ïa ki Dispensary hynrei kim lah pat ban shakri katkum ka jingbun paid hapoh ka Nongthymmai Pyllun.” u la ong.
