Shillong, Nailar 31: Ka Ïingbishar Meghalaya High Court ka la kyrpad ïa ka Iingbishar Supreme Court ba kan ailad ban shong bishar shwa ïa ka Public Interest Litigation (PIL) da kaba kdew ba ka kam ksew surok ha Meghalaya ka kham pher namar ka jinglong ba shyrkhei jong ki ksew, kaba buh ha ka jingma ïa ka jingshngaiñ jong ki paidbah bad kiwei kiwei.
Kane ka jingkyrpad jong ka Ïingbishar ka la mih hadien ba ka Supreme Court ka la bthah ban phah lut ïa ki kaiphod PIL halor ki ksew surok na baroh ki High Court ba kan shong bishar.
Shuh shuh ka Division Bench ba kynthup ïa u Chief Justice IP Mukerji bad Justice W Diengdoh ha ka hukum ba la pynmih ha ka sngi Saitjaiñ ka la ong, “watla ki don bun kiei kiei kiba long kumjuh hapdeng ka jingmudui kaba ïadei bad ki ksew ïaid wir ha ki Ïingkashari High Court bad ha Supreme Court, ngi sngew ba ka dei ka kamram jong ngi ban kdew hangne ba ha kane ka Jylla, ka don ka jingïapher ha ka jingma kaba ki buh da ki ksew surok.
“La pyntip sha ngi ba bun na ki ksew surok ki dei ki ksew dait briew bad kiba kynrup kulmar. Ha surok, ha ki lynti ïaid bad ha ki jaka paidbah, ki kynrup kynsan ïa ki briew bad ha kiba bun ki khep ki pynmynsaw jur. Haba la dep sngap ïa ki jingpyntip ha kane ka PIL, ngi sngew, nalor kiwei pat, ban phah kem ïa kine ki ksew da ki bor Sorkar, ban ai dawai, ai injek tika ïa ki bad sa buh ha ki jaka sah ba shna kyrpang ïa ki ban ïoh peit thuh shuwa ban pyllait pat ïa ki. Namar ka jinglong jong kine ki ksew, ban pyllait ïa ki khlem ka jingsngewhun ba kim dei shuh kiba dait briew bad ailad ïa ki ban ïaid ha ki jaka paidbah kan buh ha ka jingma ïa ki paidbah.”
“Namar kine kiei kiei, ngi bthah ïa u Registrar General kane ka Ïingbishar ba un phah ïa ka aplikeshon bad pan ïa ki jingbthah haba ïadei bad ka jingailad ban shong bishar ïa ka PIL ha kane ka Iingbishar,” la ong ka Bench.
ïa ka PIL la buh sngi ban shong bishar biang ha ka 15 tarik Risaw, 2025, ynta la ïoh pdiang ïa ka kaiphod na u Registrar General halor ka jingmih jong ka aplikeshon ba la phah sha ka Supreme Court.
