Shillong, K’lyngkot, 29: Ki nongïalam ka Khasi Students’ Union (KSU) Delhi Unit ba lamkhmat da ka President ka samla Marbiang Khongwir ryngkat bad ki dkhot ki la leit mar mar sha kad liengsuiñ Delhi tang shu ïoh jingtip ba u don uwei u samla shynrang Khasi uba la khie ring kynsan hapoh ka kad liengsuiñ katba u dang thmu ban wan phai sha nongbah Shillong.
Ha u kyrwoh ba la phah sha ki lad pathai khubor ryngkat bad ki video ha ka sngi Palei, la pyntip ba tang shu poi ki dkhot ka KSU ha kad liengsuiñ, ki bor ba dei peit ki la aiti ïa ka jingkitkhlieh baroh ha ki dkhot ka seng bad hadien kane la pynkit noh ïa une u samla sha hospital ba un ïoh ïa ka jingsumar ha ka por kaba biang.
Hadien ba la pyllait noh ïa u na Hospital, ïa une u khynnah samla la pynsah shwa ha Meghalaya House ha Delhi tad haduh ban da wan shimti ki bahaïing jong u na Shillong.
Ka samla Marbiang Khongwir, ka la pynpaw ruh ka jingsngewnguh ïa u Dr Arshan Khongwir uba trei ha Safdarjung Hospital na ka bynta ka jingïarap jong u ha hospital ban pynthikna ïa ka koit ka khiah jong u khynnah samla uba la khie pang.
Ka KSU, Delhi Unit ka la pynskhem biang ïa ka jingkut jingmut jong ka ban ïeng ryngkat bad ki dkhot na bynta ban kner ïa ka kti kamon ka kti kadiang ban ai jingïarap ïa ki paradoh para snam kiba ju shem jingeh bad mad ïa ki jingjynjar ha nongbah Delhi.
