Shillong, Nailur, 21: Ka jingkhynñiuh u jumai ka la par shaduh ki bynta jong ka jylla Meghalaya hadien ba u jumai uba jur 4 magnitude u la pynkhynñiuh ïa ka ri Bangladesh ha ka sngi U Blei ha ka por 11:49 baje mynstep. Kam shym la don kano kano ka jingjulor ne ka jingjia ba sngewsih ha ka jylla Meghalaya, la ong ki bor sorkar.
Ka jingkhynñiuh ka la jia hajan ka khappud jong ka jylla Meghalaya bad ka ri Bangladesh.
Ha kajuh ka por, ha ka jylla Gujarat ka la don ka jingkhynñiuh u jumai uba jur 3.1 Ritcher Scale ha ka bynta jong ka Kutch District, la pyntip ka Institute of Seismological Research (ISR). Ïa ka jingkhynñiuh la ïoh sngew ha ka por 12:41 baje mynsngi ha kaba ka thymmei ka jngai kumba 12 kilometre North North East (NNE) na Bhachau.
Kane ka la jia hadien ka jingkhynñiuh u jumai uba 2.6 Ritcher Scale ha kane kajuh ka district ha kaba ka thymmei ka long 24 kilomitar East South East (ESE) na Dholavira ha ka por kumba 6:41 mynstep, la bynrap ka ISR.
Kam shym la don kano kano ka jingjulor ki ïing ki sem, la pyntip ki bor ka District Disaster Management.
Ka Kutch District ka don ha ka jaka ïaid lynti u jumai (Seismic Zone) bad ka jingkhynñiuh u jumai uba rit ka ju jia bha khah khah.
