Shillong, Rymphang, 11: Ki shipai Border Security Force (BSF) kiba ap pahara ha khappud ka ri India bad Bangladesh ha ka shnong Muktapur, West Jaiñtia Hills District la kynnoh ba ki la sloit jubor ia ka sopti bad byrngem siat iap ia u Dr. Seiboklang Buam uba dei u Officer Incharge jong ka Veterinary Dispensary, Muktapur bad uba long ruh u nongshong shnong jong ka shnong Muktapur.
Kane ka la jia ha ka sngi U Blei ha ka por 12:05 baje noh sngi katba u Dr. Buam u dang thmu ban leit khwai dohkha na wah Lakroh kaba don ha khappud ka ri Bangladesh bad kaba jngai 2 kilomitar na Muktapur na ka surok Muktapur-Jaliakhola kaba hap hapoh u pud u sam jong ka BSF Border Out Post Hawaitila.
Ha ka ejahar ba la mudui da u Dr. Seiboklang Buam sha ki Pulit ka Muktapur PPP, u la kynnoh ba uwei u shipai BSF uba la tip kyrteng kum u Rejendra Kumar bad uwei u shipai BSF bym lah ban tip kyrteng ki la bat ia u hajan ka Shiv Mandir, Hawai Tilla ha Lakroh.
“Katba nga dang iaid lynti ban leit khwai sha wah Lakroh, ki shipai BSF ba la jer kyrteng haneng tang shu iohi ia nga ki la pynsangeh bad sdang ban tohkit ia nga la nga dei u nong India ne u nong Bangladesh. Hadien ba nga la jubab ia ka jingkylli jong ki, khnang ban buh ialade ha ka jingshngaiñ, nga la ring video da ka mobile phone ia ka jingiakren jong ngi. Tang shu iohi ia kane (ba nga ring video) ki la sdang ban ktah kti bad byrngem ban siat iap ia nga bad patrong shajan u mawpud (Zero Point) ba pyniakhlad ia ka India-Bangladesh bad nalor kata, ki la knieh ruh ia ka mobile phone kaba dang don ha ka kti jong ki tad haduh kane ka khyllipmat ba la ujor ia kane ka ejahar,” la ong u Dr. Buam ha ka ejahar.
“Katba ki dang patrong ia nga sha Zero Point Indo-Bangladesh, nga la pyrta jingiarap bad donbok ba arngut ki kynthei bad uwei u nongshong dukan uba don hajan ha kata ka por u la iohsngew ia ka jingpyrta jong nga ki la wan iarap ban iakren bad ki shipai BSF ban pyllait ia nga. Hynrei wat ha kata ka por, ki shipai BSF ba la kdew haneng ki la phah panmap ia nga da kaba ktah ia ki kjat jong ki bad pyrshang ruh ban sloit jubor ia ka sopti bad ia ka patlun ban pyniaid lyngkhuid ia nga,” la ong shuh shuh u Dr. Buam.
Ha ka video ba la saphriang ha ka social media, u Dr. Buam u la ong ruh katba u dang iania bad ki shipai BSF hadien ba ki la kynnoh ba u dei u nong Bangladesh, ma u ruh u la pynphai nia balei ki shipai BSF kim beh ia ki nong Bangladesh kiba ju sharai masi hajan u mawpud bad ka shnong Muktapur.
Halor ka jingphah panmap bad phah nguh ia ki kjat da ki shipai BSF, u Dr. Buam u la ong, “lada don kaei kaei kaba bakla nga kloi ban map hynrei ban nguh haduh ka kjat te ngam lah.”
