Shillong, Nailar, 29: Ki dkhot jong ka Khasi Students Union (KSU) na Mawkhar, Jaïaw bad Mawlai Circle ha ka sngi Thohdieng ki la rung ha ka jaka sah ki poiwir ha Lum Survey bad ïoh bat ïa ki katto katne ngut ki nongdih drok kiba rieh tngen ha kane ka jaka bad nalor kata ki dkhot ka seng ki la beh krad ïa ki nongdih drok kiba ju mlien ban shong thad lad hajan ka dukan Biloma Pharmacy ha ka lynti ban kiew sha Iewduh
Kane ka jingpynibor jong ka KSU ka long halor ka jingïoh ujor na ka por sha ka por na ki paidbah ki ju ïaid lynti na Motphran sha Khyndai Lad ba ki ju don ki nongdih drok kiba ju shong thadlad ha lynti ïaid kjat hajan ka dukan Bimola Pharmacy bad ha Lum Survey kaba la pynsyier mynsiem ïa ki nongleit nongwan khamtam ïa ki kynthei bad ki khynnah.
Ki nongïalam ka KSU ki la ïathuh ba ha ka jingthwet ïa ki nongdih drok kiba ju riehtngen ha ki iingjot ha Lum Survey la ïoh bat tang ïa ki katto katne ngut.
Ka seng ka la ong ba kan ym shong kli kti ban thwet ïa ki nongdih drok kiba ju shong thadlad ha ki lynti ïaid kiba long ka jingisaitmet ïa ka imlang ka sahlang bad kiba pynsyier mynsiem ruh ïa ki nongleit nongwan.
