Shillong, Jymmang, 18: Ki paidbah kiba don da ki spah ngut ha ka sngi u Blei ha ka por kumba 11:00 baje mynstep ki la tur sha Madanriting Police Station hadien ba ki Pulit ki la rah ïa ki arngut ki bar jylla halor ka jingkynnoh ba ki la shim pisa da kaba kular thok ban pynïohkam shipai ha Assam Regiment Centre ha Happy Valley, Shillong
Hadien kane, ki bor pulit ki la sei ïa uwei na ki ban leit rah Medical Check-up sha Hospital hynrei ha kane ka por la don uwei pat u bar jylla uba ïa ithuh ithaw bad ki ar ngut u la pyrshang ban ïada pynban ïa ki. Kane ka jingleh jong u ka la pynbitar ïa ki paidbah kiba la shah thok pisa ha kaba kiba la khynñiat bad kyrdem ïa u.
La sakhi ba ka jingkyrdem jong ki paidbah ka la long kaba i shyrkhei haduh katta hynrei shu donbok ba ki don ki Pulit CRPF kiba la ïada bad pynrung kloi kloi ïa u shapoh ka thanad. Ha ka jingïaleh ban ïada ïa u bar jylla ba un lait na ka jingshah kyrdem katba uwei u Pulit ruh u la shah ktah kti lang ha ki paidbah kiba la ngat ha ka jingshah kular thok ban ïohkam.
Haba kylli bniah na ki paidbah, la ïathuh ba ki ar ngut ki bar jylla ïa kiba la tip kyrteng kum u Amul bad u Sanju na Happy Valley naduh u bnai Rymphang mynta u snem ki la wad briew bad dawa da ka pisa haduh T. 5000 hajar ban pynïoh rungkam shipai ha ARC.
Ha kane ka jingjia ka la mih ruh ka jingïania kaba jur bha hapdeng ki paidbah bad uba ïada ïa ki bar jylla ba shukor pisa.
Ki paidbah ki la ïathuh hadien ba ki la ïoh ka jingkular ban ïoh rungkam ki la leit wad jingtip na ka ARC ha kaba ki lap pynban ba ym don satia ki kam kiba lait ha ARC.
Dei na kane ka daw ba ki paidbah kiba la shah thokl ki la khie bitar lep bad ki la patrong ïa ki arngut ki bar jylla sha thanad.
