Shillong, Nailar 20: U Chief Electoral Officer ka jylla u Dr BDR Tiwari u la pan ka jingpynshai na ki 4 tylli ki seng saiñ pyrthei kiba don ha ka jylla.
Kine ki seng saiñ pyrthei ki kynthup ïa ka Khun Hynñiewtrep National Awakening Movement (KHNAM), ka Meghalaya Democratic Party (MDP), ka North East Social Democratic Party (NESDP) bad ka Regional Democratic Secular Congress (RDSC).
Ïa kane ka jingpynbna pan jingpynshai la pynmih hadien ba ka Election Commission ka la tyrwa ban wengnoh ïa kine ki party na ka thup ki seng saiñ pyrthei ba la register na ka daw ba ki dei ki bym treikam shuh ban ïashim bynta ha ki elekshon naduh ka snem 2019.
Katkum ka Commission, kine ki party ki khlem buh kino kino ki kyrtong ha kino kino ki elekshon sha ka House of People ne ka Ïingdorbar Thaw Aiñ ka jylla ne ha ki elekshon shiteng samoi ha kine ki 6 snem ba la leit.
Ha shwa ban shim ïa kano kano ka kam, ka Commission ka la ai lad ïa kine ki party ban pynpaw ïa la ki jong ki daw lane ki jingpynshai balei ïa kane ka kam ba la tyrwa khlem lah ban shim.
Kine ki party ki donkam ban aiti da ka jingthoh ha ryngkat bad ka affidavit na u President ne General Secretary bad ki kot kiba kyrshan ïa kine ki jingpynshai.
Ha ka jingpynbna, u Tiwari u la pyntip ba ka jingbishar ïa kane ka kam la buh ha ka 3 tarik u Nailur mynta u snem, kaba dei ban shim bynta da ki President, General Secretary, ne khlieh jong ka Party.
“Lada ym ïohpdiang ïa kano kano ka jubab na kine ki party hapoh katei ka tarik, yn pdiang ba ka party kam don eiei ban ong halor kane ka kam bad ka commission kan pynmih ïa ki hukum kiba dei khlem da kynjoh ktien shuh ïa ki party,” u la bynrap.
