Shillong, Nailur, 01: Ha ka sien kaba nyngkong eh ka West Khasi Hills District Chess Association (WKHDCA) ha ka sngi saitjaiñ ka la pynlong ïa ka 1st WKH Inter Schools Chess Championship 2024 ha ka kyrdan Under-10, Under-12, Under-16 Boys & Girls Category ha SGSY Hall C&RD Block Nongstoiñ.
Ha kane ka lympung ïakob ba la ïashim bynta da ki 48 ngut ki khynnah skul na ki 9 tylli ki skul kiba don hapoh ka jylli jong ka West Khasi Hills District la plie paidbah da u Additional Deputy Commissioner jong ka District u Bah H. Kerwood Thabah uba la long kum u kongsan ryngkat ka jingsakhi lang jong ki nonghikai, ki kmie ki kpa bad ki nongkitkam ka WKHDCA.
Ki nongjop ha kane ka jingïakob ha ka Under-10 Boys ki long u heprit Paila Jyndiang ha ka kyrdan banyngkong, u heprit Wanmebanshan Khardewsaw na Anderson Higher Secondary School ha ka kyrdan ba ar bad u heprit Aaricson Marwein na KJP Synod ha ka kyrdan kaba lai.
Ha ka kyrdan Under-10 Girls ka heprit Amrisa R Marak na Anderson Higher Secondary School ka la jop ïa ka kyrdan banyngkong, ka heprit Angelgrace Shyrkonna Mawkhlam Nongpyndeng UP Schhol ka la jop ïa ka kyrdan kaba ar.
Katba ha ka kyrdan Under-12 Boys u heprit Miquel Marwein na JNV Nongstoiñ u la jop ïa ka kyrdan ba nyngkong, u heprit Raimankupar Jyndiang na Anderson Higher Secondary ha ka kyrdan kaba ar, u heprit Nehboklang Shylla na JNV Nongstoiñ, ha ka kyrda kaba lai bad u heprit Kyrpang Sangriang na Anderson Higher Secondary School ha ka kyrdan kaba saw.
Ha ka kyrdan Under-12 Girls ka heprit Phibanri Diengngan ka la long ka lahduh, ka heprit Wandarisuk Marbaniang na Anderson Higher Secondary School ka la wan ha ka kyrdan kaba ar.
Ha ka Under-16 Boys u Brian CJL Marshillong na JNV Nongstoiñ ula jop ïa ka kyrdan banyngkong, u Atiarbakynsai Marthong na Anderson Higher Secondary School u la jop ïa ka kyrdan kaba ar, u Wanlam Bok Nongrum u la jop ïa ka kyrdan kaba lai bad u Calvin Syiem na St Peter Higher Secondary School Pyndengrei u la jop ïa ka kyrdan kaba saw.
Ha ka kyrdan Under-16 Girls ka Phibanrisuklang Marbaniang ka la jop ïa ka kyrdan ba nyngkong, ka Matrikor Wahlang ha ka kyrdan kaba ar, ka Darishisha Thabah ha ka kyrdan kaba lai bad ka Saphiriti Wahlang na Anderson Higher Secondary School Nongstoiñ ka la jop ïa ka kyrdan kaba saw.
Kine ki nongjop kin sa ïohlad ban mihkhmat ïa ka West Khasi Hills District sha ka rynsan ïalehkai Meghalaya State Level Inter School Chess Championship ka ban long ha St. Anthonys Higher Secondary School, Shillong ha ka 20 tarik bad 21 tarik mynta u bnai.
