Shillong, Naiwieng, 13: Ha ki lai sngi lynter ba la pynlong ia ka 2nd edition jong ka Kelvin Cinema Festival 2023, kata, ha ka 9, 10 bad ha ka 11 tarik u Naiwieng 2023 ha SoSo Tham Auditorium Shillong, la sakhi ia ki sap shna phlim jong ki khasi ba la pyni ha kane ka tamasa ba la bei pisa da ka Shankar Lall Goenka & Jeevan Ram Mungi Devi Goenka Public Charitable Trust ha ryngkat ka jingiatreilang bad ka Fraternity Art Cine Entertainment, Shillong.
Ha kine ki lai sngi lynter la pyni haduh 12 tylli ki phlim kiba la shah jied na kylleng ka ri India bad napdeng kine ki 12 tylli, la pyni paidbah ruh ia ki lai tylli ki phlim lyngkot ba la shna ha ka ktien Khasi ia kiba la ai kyrteng kum ‘ka Pateng, ka Jyllop bad ka Gray.
Ha ka sngi pynkut ia kane ka tamasa pyni phlim, la sakhi lang da ka Editor jong ka Kotkhubor The Shillong Times ka Kong Patricia Mukhim kaba la long kum ka Kongsan, ka Rima Das kaba dei ka National Awardee, kaba la long kum ka symbud Kongsan kiba la sam ia ki khusnam sha ki nongjop ha kane ka tamasa pyni phlim.
Ia ka nam Best Film la ioh da ka ” Son of the Soil” ba shna da ka Akashnya Bhahabati, katba ia ka nbam Best Director la ioh da u Sankirang Khongwir uba la shna ia ka phlim, ‘Ka Pateng,’ ia ka nam Best Actor na ki shynrang la ioh da u Pynkmen Lyngdoh Mawnai uba la ak ha ka phlim “Ka Pateng bad Jyllop’, ia ka nam Best Actor na ki kynthei la ioh rah da ka Millo Sunka kaba la iashim bynta ha ka phlim ‘Noctural Burger,’ ia ka nam Best Cinematography la iohrah da u Bah El Dhar na ka phlim ‘Pateng,’ ia ka nam Best Sound Design la ioh da u Sukanya Bhawal na ka phlim ‘Ek Divas’ bad ia ka nam Best Editor la ioh rah da ka Reema Maya bad u Rohan Kapoor na ka phlim Noctural Burger.
Haba kren sha ki lad pathai khubor u Bah El Dhar bad u Bah Sankirang Khongwir ki la pynpaw ia ka jingkmen ba ki la shah jied ban ioh ia shim bynta ha kane ka tamasa pyni phlim bad ioh khur ruh ia ki khusnam. Ki la ong ruh ba lada don kum kine ki tamasa ki iohlad ban pyni ia ki phlim ba ki khun samla kiba don sap ha ka kam shna phlim kin dup iohlad ban pynpaw pyrthei ia la ka sap ka phong ba ki don.
