Shillong, Risaw, 30: Ka Khasi Student Union, Barrak Valley Circle kum shi bynta ban ithuh ithaw ia ki samla pule kiba dang shu wan thymmai na ka bynta ban bteng ia ka jingpule, ha ka sngi Saitjaiñ jong ka taiew baladep ka la pynlong ia ka prokram sam khusnam bad kumjuh ka jingpdiang burom ia ki samla khasi kiba sah ha Silchar, Assam.
Ha kane ka sngi, ka seng ka la pynkup burom ia ki 45 ngut ki samla kiba la pas bha kiba wan na kylleng ka them Barrak Valley.
La sakhi lang ha kane ka sngi, da u President jong ka KSU u Samla Lambokstar Marngar ryngkat ka jingsynran lang jong u Assistant Secretary ka KSU u Samla Rueben Najiar bad ki dkhot jong ka Central Executive Committee, u Chairman ka Khasi Jaintia Village Development Council Bah Sebastian Pakyntieñ, u President jong ka Barak Valley Khasi Jaintia Welfare Organisation Bah Charles Rymbai, u General Secretary jong ka Barrak Valley Khasi Jaintia Welfare Organisation u Bah Wanbor Pdang bad kiwei kiwei.
La pynphuh pynphieng ia kane ka jingialang da ki jingshad tynrai bad la pynlong ruh ia ka jingiakop Master Freshers bad Miss Freshers ha kaba ia ka nam jop la iohrah da u Samla Hamjngai Bareh kum u Mr. Freshers bad ka samla Manisha Pohdweng kum ka Miss Freshers jong u snem 2023.
