Shillong, Risaw, 11: U Myntri ka Sorkar Jylla uba khmih ïa ka tnat ka rep ka riang u Timothy D. Shira u la pynshlur ïa ki nongrep ba kin pdiang ïa ka skim Pradhan Mantri-Dhan Dhaanya Kisan Yojana (PM-DDKY) khnang ba kin ïohlad ban nang pynbha shuh shuh ïa ka rep ka riang jong ki.
Ïa ka skim Pradhan Mantri-Dhan Dhaanya Kisan Yojana la pyllait paidbah da u Myntri Rangbahduh ka ri u Narendra Modi ha National Academy of Agricultural Sciences, New Delhi ha ka sngi Saitjaiñ.
Ha Meghalaya, ki nongrep ki la ïashim bynta ban peit ïa kane ka prokram ba la pyni Live ha ka jingïalang kaba la long ha Integrated Agricultural Training Centre, Upper Shillong.
Ïa kane ka jingïalang hapoh ka jylla la pynlong da ka jingïatreilang ka tnat Agriculture and Farmers’ Welfare, Sorkar Jylla, ka Krishi Vigyan Kendra, East Khasi Hills bad ka Meghalaya Agricultural Management and Extension Institute (MAMEI).
Ki nongrep na ki Block bapher bapher jong ka distrik ki la ïoh ban ïashim bynta ha kane ka prokram ha ka jingïadon ryngkat lang ki ophisar na ki tnat bapher bapher.
U Timothy D Shira, haba kren kum u Kongsan, u la pynshlur ïa ki nongrep ba kin shim ïa ka lad ban ïoh ïa kane ka skim jong ka Sorkar Pdeng kiba kynthup lang shibun kiwei ki skim khnang ban ïoh pynbha shuh shuh ïa ka rep ka riang ha ka jylla.
U la batai ruh shaphang ki bynta bapher bapher kiba ïadei bad kane ka skim bad u la kyntu ïa ki nongrep ban pynbiang ïa ki jingdonkam ban ïoh bynta na kine ki jingïarap.
Kum shibynta jong ka prokram, la ai por ruh ban ïamir jingmut hapdeng ki nongrep bad ki ophisar ha kaba la ïoh ïa ki jubab bad jingbatai ïa ki jingkylli jong ki nongrep.
