Shillong, Naiwieng, 13: Ka jingïalang ba la pynlong da ki arngut ki Symbud Myntri Rangbah, Bah Prestone Tynsong bad u Bah Sniawbhalang Dhar, ka la pynbeit ban pyntreikam tang kawei ka dor kit kaba T.9 shi ton shi kilomitar na ka bynta ka jingkit dewbilat bad clinker hapoh u pud u sam jong ka jylla Meghalaya.
Ïa kane ka rai, la pdiang da ki nongmihkhmat jong ka Jaiñtia Hills Cement Manufacturers Association (JHCMA) bad ki lai tylli ki seng, kata, ka Jaiñtia Hills Truck Owners & Drivers Association, ka East Jaiñtia Hills Truck Owners & Transporter Association, bad ka Meghalaya Commercial Truck Owners & Drivers Association, ha ka jingïalang kaba la long ha Main Secretariat ha ka sngi Palei.
Ka jingpynlong ïa kane ka jingïalang ka long hadien ba ka MCTODA ka la pynlong da ka jingïakhih kaba khlem pud sngi ha surokbah jong ka shnong Mawryngkneng, East Khasi Hills District.
Ha ka jingïakren bad ki lad pathai khubor hadien ba la wai ka jingïalang, u Symbud Myntri Rangbah uba khmih ïa ka tnat Transport Bah Sniawbhalang Dhar ula ong ba ka jingïalang ka long kaba seisoh bad bun tylli ki mat la ïakren bad ïa kiwei kiwei ki mat la pynkynriah ruh ban ïakren ha ka taiew ban sa wan.
Ka dor ba la buh thymmai kaba long T.9 ka la bujli noh ïa ka dor kaba la buh mynshwa T.7– T.11 shi ton na ka bynta shi kilomitar, ka sienjam ba la pdiang sngewbha da baroh ki nongkit mar kiba don lang, u la ong.
Katkum ka jingong jong u, ka dor T.9 kan treikam tang hapoh ka jylla. Ka jingkit palat pud bad ka dor kit shabar u pud u sam jong ka jylla Meghalaya kim shym la don satia ha ka mat jingïakren.
U Bah Dhar u la ïathuh ba ka Sorkar ka la ka pynbor ruh ban ai bhah 120 tylli ki trok na ka bynta ki kali trai jylla, ha kaba 80 tylli ki trok ki la ïoh lypa ïa ka bhah.
“Ki (bor pynïaid karkhana pynmih dewbilat) ki la mynjur ban ai 100 hynrei ngi dang pynbor ban pynïoh sa 20 tylli,” u la ong bad bynrap “la ai por shi taiew ïa ki bor pynïaid jong ki karkhana ban shim rai halor kane ka jingmang bhah.”
U la pyntip ba la buh sngi ban pynlong biang ïa ka jingïalang ha ka 21 tarik mynta u bnai, ban pynkut noh shi syndon ïa kane ka kam.
Ha kawei pat ka liang, u President ka MCTODA u Bah Mosklander Marngar u la ong ba ka seng ka la pynkynnaw ba kumno ki bor pynïaid jong ki karkhana dewbilat, ki la ‘khñoit’ ïa ka dor kit mar da kaba pynhiar bad pynkiew ïa ka jingsiew kaba T.7 – T.11 shi tonne na ka bynta shi kilometre ban kit ïa ka dewbilat bad ïa u clinker.
“Hadien ka jingïakren kaba jlan bha, ban lait na baroh ki jingïakynad lada phim kwah ban ai ïa ngi T.11 shi ton, phi dei ban ai ïa ka dor kaba la buh, wat ai ïa kane ka jingthew kaba T.7 haduh T. 11, kaba ailad ïa ki ban khñiot dor ïa ngi kiba dei ki trai bad ki nongñiah trok,” la batai u Bah Marngar.
U la pdiang sngewbha ïa ka jingïakren kaba mih na ka jingïalang ba la khot da ki Myntri Rangbah ka jylla u Bah Prestone Tynsong bad u Bah Sniawbhalang Dhar, da kaba kdew ba ki arngut ki nongïalam “ki la rai ban pynbeit ïa ka dor kit ha ka dor T. 9 shi ton shi kilometre” tang hapoh ka jylla.
Hynrei u Bah Marngar u la kdew ïa ka jingbym ïahap ha ka jingai kit mar ïa ki trok da kaba ong, “ki trok ba la pyndonkam da ki karkhana pynmih dewbilat nabar ka jylla ki don haduh 1,000–2,000 tylli ha ka shisngi, katba tang 80 tylli ki trok (kiba dei jong ka seng nongñiah trok jong ka Jaiñtia Hills Truckers Association bad ka East Jaiñtia Hills Truck Owners Association) kiba ju kit mar manla ka sngi.
U la pynpaw ïa ka jingbym hun halor kane ka rukom ïa pynbeit bad u la ïai ban ïa ka jingdawa ba dei ban buh shwa ha khmat ïa ki trok kit mar jong ki trai jylla namarba ki karkhana ki don hapoh u pud u sam jong ka jylla Meghalaya.
“Ki bor pynïaid jong ki karkhana shna dewbilat ki la pynsngew ha ka jingïalang ba kin sa shong jingïalang shwa ban shim ïa ka rai halor kane,” la bynrap biang u Bah Marngar.
Baroh arngut ki Myntri Rangbah ki la pynthikna ba ka Jaiñtia Hills Cement Manufacturers Association kan sa shim ïa ka rai hapoh shi taiew.
