Shillong, Risaw, 30: U Chief Executive Member (CEM) ka Jaiñtia Hills Autonomous District Council (JHADC) Bah Thombor Shiwat ha ka sngi Palei u la ïathuh ba ka Council ka la mynjur ban pdiang ïa ka jingtyrwa jong ka Sorkar Jylla na ka bynta ban siew ïa ka tulop jong ki nongtrei ryngkat ka jingbuh ruh ïa ki kyndon.
“Ngin pdiang ïa ka (jingtyrwa ka Sorkar) hynrei bad ki kyndon,” ong u Bah Shiwat ha ka jingïakren bad ki lad pathai khubor hadien ka jingïakynduh ïa u Symbud Myntri Rangbah ka Jylla uba khmih ïa ka tnat District Council Affairs (DCA) Bah Prestone Tynsong ban kylli halor ka jingshim rai jong ka Council halor ka jingtyrwa jong ka Sorkar.
U la ong ba ka Council ïa mynta kam pat phah ïa ka jubab sha ka Sorkar Jylla.
Ki kyndon, la batai u Bah Shitwat, ki long kiba ïadei bad ka jingangnud jong ka Council ban peit bad ban pynïaid hi ïa ki jinglum khajna, ba kynthup ïa ki marpohkhyndew kiba rit bad kiba heh, ka khajna na ki kali, ïa kiba mynta la lum beit da ka Sorkar Jylla.
Ka Council ka kwah ban pynduna ïa ka jingshaniah ha ka Sorkar Jylla bad wad jingïarap ruh ban pynbeit ïa la ka jong ka pla tyngka.
Ha kaba ïadei bad ka jingkyrduh pisa ha ki 5-6 bnai ba la leit noh, u Bah Shitwat u la ong ba ka Council ka dang ap ïa ka Sorkar ban kheiñ diah ïa ka bhah ba ka Council ka dei ban ïoh.
“Tang shu dep ka jingïakheiñ ïa diah, ka Council kan sa shim rai kumno ban leh nangne shakhmat,” u la ong.
