Shillong, Naiwieng, 20: U Banshemstar Mawthoh, u nongñiah trok uba dei ruh u dkhot jong ka Meghalaya Commercial Truck Owners & Drivers Association (MCTODA) u la ïathuh ba ki Pulit ka Mawryngkneng Police Station ki la maham lada u weng ïa ka ejahar un shah kem.
U Bah Mawthoh u la phla ïa kane, ha jingïakren bad ki lad pathai khubor ha ka sngi Palei, hadien katto katne taiew ba u la shah kawut lathi ha ka jingïakhih ka MCTODA ha surokbah Mawryngkneng ha ka miet shiteng synñia 5 tarik, Naiwieng, 2025.
“Nga don lang ha Mawryngkneng bad ha ki shi sngi ar sngi ngi shu pynphai tang ïa ki kali bad ha kato ka miet ba ngi pynphai kali nga shu ïoh sngew ba riew u bom bad sat ki khmat bad ki Pulit ki bom (lathi). Ynda ladep bom ki sa pyllait noh. Ha kata ka por nga la leit noh shaba don lang ki para nongñiah trok ban shong ha ka kali ban leit shah sumar. (Hynrei) na kali ki (Pulit) wan sei tang ïa nga marwei ban ïalam sha ka jaka ba ieng lang ki Pulit bad ha pla u don u shabi kali bad u handle lock. Ki Pulit ki ong ba nga tuh ma nga ïa u shabi jong ka trok. U shabi kali nga thep beit ha pla namar tang shu pyllait kali nga ruh nga hap ban sei ïa ka kali ban leit pynhap mar,” ula ong.
“Ki (Pulit) knieh ïa u shabi, u Handle Lock. Nangta ki ïalam sha Dispensary bad nga dang pyrkhat ban leit noh sha iing namarba ngam da mynsaw jur. Hynrei ki phah rung hapoh kali Gypsy nga ong beit ba ngam treh. Hynrei ki phah rung jubor ha kali Gypsy. Ynda poi ha thanat ki ong ap shiphang i mei ruh i don lang haduh ka por 3:00 baje mynstep,” la ïathuh u Bah Mawthoh.
“Ha ka sngi kaba bud ka poi ka kot ba ki phah saiñ ïa nga bad ki kylli ba nga la ju leh (ujor) ejahar neem nga la ong em. Ki Pulit ki phah saiñ ïa ka kot bad nga dang pyrkhat ba ynda ladep saiñ ngan sa ïoh leit phai sha iing. Ynda poi sha iing hadien katto katne sngi nga leit bylla ban pynhap mar sha Silchar. Ka la poi ka phone call ba la wad ïa me. Ha YouTube me kren da kumwei, ha ka ejahar me kren da kumwei,:” la ïathuh shuh shuh u Bah Mawthoh.
U la ïathuh shuh shuh “ynda u la tohkit na ki para nongñiah trok ki ïathuh ba ha ka ejahar la kynnoh ba ki nongñiah ki shoh ïa nga. Haba ki Pulit hi ki shoh kiba bom ïa nga, kumno ngan ong ba ki nongñiah trok ki shoh ïa nga. Ha kajuh hi ka por ngi shah shoh bad kine ruh ki ïohi. Ynda nga leit biang sha Silchar ka poi biang ka phone call da uwei u nombar ba ngam tip kaba ong ba ka court ka la wad ïa me bad phah leh video call.
U la ïathuh ba hadien kane, shi sngi ar sngi um nud shuh ban leit phai sha la iing.
“Ka poi biang ka phone call na Thanat bad ki ong wan tang shi minit lah biang bad haba nga kylli, kim ong eiei,” u la ong bad bynrap ynda u leit mih sha thanat ha ka sngi u Blei u Officer In-charge um don bad naduh katei ka sngi ki Pulit ruh kim shym la khot shuh ïa u sha thanat.
Haba kylli, u Bah Mawthoh u la ong ba ïa ka ejahar la thoh hi da ki Pulit Khasi.
“Kumba ka long mynta nga sngew ba nga don ha lyer bad kaba nga kwah mynta ka long ban pyndam noh ïa ka ejahar. Haba ngi ïa long kum shi para (bad ki nongñiah trok nangno ka mih kata ka ejahar ba bom ki nongñiah trok ïa nga,” la buh jingkylli u Bah Mawthoh.
U la ïathuh ruh ba ka jingsoi ïa ka ejahar ba la phah da ki Pulit ka long namarba um nang satia ban thoh ne pule bad u la ong ruh haba u la pan kopi ïa ka ejahar ki Pulit kim shym la ai satia bad wat tang ban shondur da ka mobile phone ban pyni ïa ka kmie kaba nang ban pule ruh kim ai.
U la ïathuh ba hadien kata, ka la poi biang ka phone call kaba ong, halor kane, u President ka MCTODA u Bah Mosklander Marngar u la ong ba ka seng kan ym ieh wat ïa uwei ruh u paradkhot uba la ngat ha ka jingmynsaw bad ïa u Bah Banshemstar Mawthoh da kaba ïasyllok bad ki muktiar.
“Ngim shym la ieh ïa i (Banshemstar Mawthoh). Lada dei bad ka aiñ ngin ïaid hi bad ki riewsaidaiñ,” u la ong.
