Shillong, Naitung, 30: Ka Iingbishar Meghalaya High Court ka la bthah ïa ka komiti ba la thaw da u Chief Secretary ba kan pynlong shuh shuh ïa ki jingïalang na ka bynta ban pynbeit ïa ki jingïakajia kiba ïadei bad ki jaka thang metïap bad ki jaka tep ïa ki jaitbynriew bapher bapher ha ka jylla.
“Ngi bthah ïa ka Committee ban pynlong shuh shuh ïa ki jingïalang bad ban shim ïa ka rai,” la ong ka Division Bench kaba kynthup ïa u Chief Justice IP Mukerji bad u Justice W Diengdoh ha ka hukum ba la pynmih hadien ba la bishar ïa ka PIL ha ka sngi Balang.
Ka Bench ka la kdew ïa ka jingïapher hapdeng ki jaitbynriew Hindu bad ki jaidbynriew Khasi-Jaiñtia ha kaba ïadei bad ka jingïapyndonnkam lang ïa ki jaka thang metïap bad ka jingduna ki jaka tep ïa ki kynhun Khristan, kiba la don ha ki jong kino ki kynhun niam bad la ki jong ki jong ki jaka tep.
Ban weng ïa kine ki jingeh, ka Iingbishar la thung ïa u Amicus Curiae ban pynbeit ïa ka jingïakren hapdeng ki kynhun bapher bapher kynthup ruh ïa ki ophisar ka sorkar.
U Amicus Curiae u la pyntip sha ka ïingbishar ba la pynlong ïa ka jingïalang bad ka lah ban don shuh shuh ki jingïalang shen ban pynbeit ïa kane ka jingïakynad.
Katto katne na ki dkhot jong ka niam Hindu, Khasi bad Jaiñtia ki la mynjur ban ïa pyndonkam lang ïa ka jaka thang metïap ryngkat bad ki jaka ba la ai kyrpang ïa kawei pa kawei ka jaitbynriew.
“La ïathuh ha ngi da u Amicus Curiae ba ki don ki dkhot jong ki jaitbynriew Hindu, Khasi bad Jaiñtia kiba la mynjur ban ïasam lang ïa ka jaka thang metïap. U la pynpaw shuh shuh ba lada lah ban pynsngewthuh ïa kiwei pat ban bud ïa kane, ym don kaei kaei kaba kham bha. Lym kumta, ka Komiti ka lah ban pyrkhat ban wad jaka ruh na ka bynta ban thang metïap,” la ong ka Bench.
Ka Iingbishar ka la bthah ïa ka Committee ban wad bniah shuh shuh ïa kane ka lad bad ban pyrkhat ban wad jaka na ka bynta ban thang met ïap lada donkam.
Ïa kane ka komiti kaba kynthup ïa ki nongshim bynta ba la jied, la bthah ban shim sha ka rai halor ka jingpyndonkam ïa ki jaka thang metïap bad ki jaka tep briew.
Ka ïingbishar ka la bthah ïa u Amicus Curiae ban ai ïa ka kaiphod ba lyngkot halor ka jingïaid lynti jong ka komiti.
Ïa kane ka PIL la buh sngi ban bishar biang ha ka 14 tarik, Nailar, ban pynthikna ïa ka nongrim bad ban bishar bniah ïa ka jingtreikam jong ka komiti.
