Shillong, Rymphang, 05: Ka Iingbishar Meghalaya High Court ha ka sngi Balang ka la pan kaiphod ha kaba ïadei bad ka jingmaramot ïa ka surokbah National Highway-6.
Ka hukum ba la pynmih da ka Bench ba kynthup ïa u Chief Justice IP Mukerji bad u Justice W Diengdoh hadien ba la shong bishar ïa ka PIL ïa kaba la mihkhmat da u Muktiar S. Sengupta, na ka bynta ka National Highways Authority of India (NHAI) u la aiti ïa ka jubab ha kaba ïadei bad ka hukum ba la pynmih ha ka 11 tarik, Nohprah, 2024, ba ka shilynter kaba 5 kilomitar jong ka surok National Highway (NH -6) hapdeng ka Jowai bad ka Ratacherra, ka shilynter jong ka surokbah kaba 45 kilomitar ruh la donkam ban maramot.
U la aiti ruh ïa ka jubab ba pyntip ba ka jingmaramot ïa ka bynta kaba 45 kilomitar ka la ïaid shakhmat, bad kan dang ïai bteng tad haduh ban da pyndep pura ha ka por kaba biang.
“Lada pyntrei noh marmar ïa ka jingmaramot ïa ka surok katkum ka jingai jubab da u S. Sengupta, ka surokbah baroh kawei kaba jrong 102.225 kilomitar kan lait war na kino kino ki jingshah pynwit bad ka leit ka wan kan tyllun beit sak sak, kan wanrah ruh ïa ka jingmyntoi jong ki nongpyndonkam bad ïa ka Jylla. Ha ki katto katne ki khep, ngi bthah ïa u Amicus Curiae ba ngi la thung ban jurip ïa ka surokbah baroh kawei bad ban phah ïa ka kaiphod sha kane ka Iingbishar shwa ka 21 tarik, Rymphang,, 2025,” la bthah ka Bench.
Ka Iingbishar ka la bthah ïa ka Jylla ba ka dei ban pynbiang lut ïa ki jingdonkam ha ka leit ka wan, ka shong ka sah, lada donkam, ïa u Amicus Curiae bad ka NHAI ka dei ban siew ïa ka bainong kaba T. 20,000 hajar ïa u halor kijuh ki kyndon kumba ladep siew teng mynshwa.
