Shillong, Jymmang, 20: Ka Sorkar Jylla ka la bthah ïa ki bor synshar district ban khynra naphang bad ban kem ïa ki mynder Bangladeshi bad ki Rohingya ha ka jylla kiba shu wan rung be-aiñ.
Kane ka jingbthah ka la wan hadien ba ka Ministry of Home Affairs (MHA) ka la bthah ïa baroh ki Sorkar Jylla bad ki Union Territories ban thaw ïa ki Special Task Forces (STF) ha manla ki district ban ithuh bad ban pynphai lut ïa baroh ki mynder Bangladeshi bad ki Rohingya hapoh 30 sngi.
Ha ka jingïakren bad ki lad pathai khubor ha ka sngi Baar, u Symbud Myntri Rangbah uba khmih ïa ka tnat Kam Pohing Bah Prestone Tynsong u la ong, “haoid, ngi dang trei ïa ka kam. Ngi ladep ai ka jingbthah ïa baroh ki bor synshar district bad ïa ki Deputy Commissioner ban khynra naphang haba ki suba ne ki ïoh jingtip (shaphang ka jingdon jong ki mynder kiba rung be-aiñ), ki dei ban kem beit mardor.”
U Bah Tynsong u la pyntip ba la bynshet ha ki District Task Force (DTF) ïa ka kamram ban khmih bniah ïa ki briew kiba wan sha ka jylla bad kiba shong basah ha ki district bapher bapher. Ki DTF ki la treikam katkum ba la kdew da ka Meghalaya Residents Safety and Security Act (MRSSA), 2016.
“Ha kaba ïadei bad ki mynder ba shu rung beaiñ, ngi la bthah ïa ki DC ban phah khynra bad ban buh hakhmat eh ïa kane ka kam. Dei ban bud pyrkhing bha ïa ka (Foreigners’) Act,” u la bynrap.
