Shillong, Jylliew, 25: Ka Ïingbishar Meghalaya High Court ka la bthah ïa ka Sorkar Jylla ban shim ïa ki lad ki lynti kiba bniah na ka bynta ban pyntreikam tyngeh ïa ka jingkhang ïa ki tiar plastik ba la pyndonkam tang shisien bad bret noh kiba duna ïa ka 120 micron ha ka jylla.
Ha ka hukum kaba la pynmih hadien ba la bishar ïa ka PIL, ka Division Bench kaba kynthup ïa u Chief Justice IP Mukerji bad u Justice W Diengdoh ka la ong, “ngi bthah ba dei ban shim ïa ka sienjam kaba bniah ban pyntreikam ïa ki hukum jong kane ka Ïingbishar kaba la buh ha ka 16 tarik, Nailar, 2024 ba la pule ryngkat bad ki hukum kiba hadien, ka hukum kaba khatduh ka dei kaba la pynmih ha ka 14 tarik, Jymmang, 2025 bad ki lad ki lynti ba la pdiang da ka Sorkar.
Ka ïingbishar, haba bishar ïa ka kaiphod ba la aiti da ki nongshah mudui, ka la ïohi ba ïa ki kam ha kaba ïadei bad ka hukum ba la pynmih ha ka 16 tarik, Nailar 2024, la shim tang ha kawei ka bynta jong ka East Khasi Hills District ym ha kiwei pat.
Ka Ïingbishar ka la pynmih ïa ka hukum kaba bniah ha ka 14 tarik Jymmang, 2025, ha kaba la bthah ïa ki Deputy Commissioner ban pynlong ïa ki jingpynsngewthuh paidbah, ban pynbna paidbah ïa ki jingma ïa ka koit ka khiah na ka jingpyndonkam ïa ki plastik bad ban shim ïa ki lad ki lynti ban khanglad ïa ka jingshna, jingdie, bad jingpyndonkam ïa ki tiar plastik ba la khang pyrshah.
Mynta ka sngi, u nongïasaid aiñ na ka bynta ka Jylla u la ai ïa ka kaiphod kaba pynpaw ïa ka jingbud ryntih ïa ka hukum jong ka Ïingbishar kaba la pynmih ha ka 14 tarik Jymmang, 2025. Ka kaiphod ka la batai bniah ïa ka jingbud ryntih ha ki 11 tylli ki distrik, lait noh ka East Jaiñtia Hills.
Ka Ïingbishar ka la bthah ïa ka Jylla ban ai ïa ka kaiphod jong ka jingbud ryntih da ki bor synshar jong ka East Jaiñtia Hills shwa ka tarik bishar kaba bud.
Ka Ïingbishar ka la kdew ba ka District Magistrate, East Khasi Hills District, ka la pynmih ïa ka “hukum ba la khang ban die bad pyndonkam ïa ki pla plastik kiba duna ïa ka jingbren 120 micron naduh u bnai Jylliew2025.” La pynmih ïa ki hukum ba la khang kumjuh ha kiwei ruh ki distrik, bad la sdang ïa ki jingpynsngewthuh paidbah, ka jingpeit bniah, bad ki lad ki lynti pyrshah ïa ki nongleh bymman.
Shuh shuh ka Ïingbishar ka la bthah ïa ka Jylla ban aiti ïa ka kaiphod ba la pynikam ha ka tarik shong bishar kaba bud ka ban sa long ha ka 12 tarik, Nailar, 2025.
