Shillong, Naitung, 22: Ki ophisar na ka tnat Labour, na ka tnat Pulit bad na ka tnat Infiltration jong ka Ri Bhoi District ki la hiar khynra ïa ki nongbylla kiba wan nabar ka jylla kiba trei ha ki karkhana bapher bapher kiba don ha MIDC Umïam Industrial Area.
Ha ka jingkhynra ïa ki nongbylla bar jylla da ka jingïatreilang ryngkat bad ki nongïalam jong ka Dorbar Shnong Umïam, la lap ba bun na ki nongbylla bar jylla ki dei ki bym don satia ïa ki kot ki sla kiba biang.
Ha ka jingtohkit, la lap ba ym tangba ki nongbylla kim don ïa ki kot ki sla kiba biang hynrei kim ju leit mih hi ruh wat sha ki thanat ban leh ïa ka Police verification.
Ha ka jingïakren bad ki lad pathai khubor, u Rangbah Shnong jong ka shnong Umïam u bah Stevenson Kharkrang u la ïaroh ïa kane ka sienjam jong kine ki lai tylli ki tnat treikam jong ka Sorkar ban peitngor ïa ka jingwan rung jong ki nongbylla beaiñ nabar ka jylla hapoh ka Industrial Area kaba don ha ka shnong Umïam.
U la pynpaw ruh ba ka Dorbar Shnong ka sngewkhia haduh katta katta ïa ka jingïoh rung beaiñ jong ki nongbylla bar jylla hapoh Industrial Area kaba don ha ka shong Umïam bad ha kajuh ka por u la kyntu ïa ka Sorkar ban pyntreikam pura noh ïa ka Meghalaya Residents Safety and Security Act lyngba ka District Task Force khnang ban ïada ïa ka jingwan rung kyrthep jong ki nongbylla kiba wan nabar jong ka jylla Meghalaya.
